ONIIPA – Minista womayambulepo eedoolopa  nokomikunda Erastus Uutoni okwa kumaida elelo lodoolopa yaNiipa opo li kale li na ombili novakalimo valo nokulongela kumwe.

“Kaleni mu na oukumwe nombili. Xulifei po okukala tamu kondjifafana,” ta ti.

Okwa weda po ta ti itashi ulike efano liwa ngeenge ovaleli tava kondjifafana ile vehe na ombili.

Edi Uutoni okwe di popya onghela pefimbo kwa li ta patulula pambelewa eembelewa delelo lodoolopa yaNiipa. 

Ovakwashiwana okwa li va holoka momwaalu mushona kepatululo leembelewa delelo lavo.

Uutoni okwa ti elongelokumwe ola fimana meedoolopa molwaashi otashi yambula po eedoolopa.

“Topolafaneneni omayelele nghene mu na okuyambula po odoolopa yeni. Eteni omayakulo popepi noshiwana,” ta ti.

Minista okwa ti epangelo otali twikile nokuyambidida omalelo eedoolopa.

Uutoni okwa lombwela elelo lodoolopa yaNiipa opo li tameke okuninga omaulikilo oipindi.

“Omaulikilo oipindi okwa fimana molwaashi otaa etele odoolopa oyuuyemo,” ta ti.

Okwa weda po ta ti omaulikilo oipindi otaa etele yoo vali oshiwana eemhito doilonga nokulandifa oilandifomwa yavo.

Minista okwa popya ta ti ovakalimo vomodoolopa yaNiipa nava kale tava futu oifendela yomayakulo aa muni.

“Odoolopa otai xumu ashike komesho ngeenge ta futu omayakulo oifendela yelelo lodoolopa yeni,” ta ti.

fhamalwa@nepc.com.na