ONGWEDIVA- Omelelo eedoolopa moshilongo okwe li unganeka okuninga oivilodimbuluko oku yandja efimaneko laxuuningwa kOmupresidente Hage Geingob.
Ovakalimo vomeedoolopa Otavi noTsumeb, meedoolopa edi mwa patukila Geingob okwa li va holoka momwaalu muhapu okudimbuluka Geingob mexuliloshivike.
Onghela elelo lodoolopa yaNgwediva mwa kwatelwa ovaleli veengeleka va yooloka noshoyo ovakalimo ova ningila oivilo eshi kendiki lomangeshefelo mOngwediva.
Ovapopi va yooloka ova tanga Geingob tava ti okwa li omuleli wo shili omulumenhu e na elandulafano.
Ngoloneya woshitukulwa shaShana Elia Irimari okwa ti elalakano loivilodimbuluko opo oshiwana shi hangane lokuyandja efimaneko kOmupreidente Geingob molwashi ovanhu vamwe itava ka mona omhito yoku ya koWindhoek koshitufidimbuloko sha kula.
Irimari okwa ti oshivike sha dja ko ombelewa yaye oya ninga omutumba noomayola vomalelo eedoolopa ngaashi Ondangwa, Oshakati nOngwediva opo va kundafane nghene tava ka ninga omalongekido oivilodimbuluko yomupresidente mukulu.
Ta ti momutumba ova tokola opo va tule po omafiku oivilo ei a yooloka shaashi oshivike shadja ko omalelo oo okwali a ninga omalongekido okuninga oivilodimbuluko yao mefiku limwe.
Mayolo wodoolopa yaNdangwa Paavo Amwele okwa koleka ta ti ovakalimo vomOndangwa otava ka ngudumana nena potundi 18h30 kokapale komaundano kosekundofikola yaAndimba Toivo ya Toivo.
Onghee okwa indila oshiwana opo shi holoke momwaalu muhapu okuyandja efimaneko kOmupredente Geingob.
Elelo lodoolopa yaShakati nodoolopa yaKahao otaa ka ninga oitufidimbuluko mongula meedoolopa davo.
– fhamalwa@nepc.com.na