OSHIKUKU – Minista goondoolopa nomayambulepo gokuushayi Erastus Uutoni okwa kumagidha omalelelo goondoolopa agehe ga kale aluhe tage ya po noondunge dhongushu dha yooloka, opo ga humithe komeho oondoolopa.
“Kehe uupyakadhi owu na ekandulepo, ngele ope na shoka tashi nyengana, napu kale hapu kambadhalwa sha tango, omanga inaa ku kuthwa etokolo lyahugunina,” ta kumagidha ngaaka.
Ta popi ta ti, aaleli yomomalelo goondoolopa oya hogololwa opo ya humithe oondoolopa dhawo komeho, ihe shoka otaye shi ningi ashike ngele taya dhiladhila nawa, nokuya po nomadhiladhilo omape ngoka taga kandula po omaupyakadhi.
Minista okwa popi wo ta ti, ondoolopa ohayi humu komeho ashike ngele elongelokumwe lyaaleli lyi li nawa.
“Otandi indile wo natango omalelo gopamuthigululwakalo, ga kale taga yamukula omalelo goondolopa ngele taga konkola pomiyelo dhawo, uuna ya hala omakwatho ngaashi gomavi, nokuhumitha komeho oondoolopa dhawo,’’ ta indile ngaaka.
Uutoni okwa li ta popi ngaaka esiku kwa li ta gandja omagumbo pambelewa Omandaaha goshiwike shika kOshikuku moshitopolwa shaMusati.
Esiku ndyoka Uutoni, okwa li a tsu omukumo aalumentu opo ya tameke okukonga omalukalwa gawo yene.
“Aalumentu oyendji oya edhililwa kaakiintu, oshoka kaye na omagumbo gawo yene,” ta nyenyeta ngaaka. Ta ti, otashi sitha ohoni, aalumentu oyo ye na okukala omutse gwegumbo, ihe oya edhililwa kaakiintu.
Uutoni okwa popi wo kutya momwaalu gwaantu ya pewa omagumbo, oyendji aakintu, omanga aalumentu taya yalulwa.
Ngoloneya gwoshitopolwa shaMusati Erginus Endjala naye esiku ndyoka okwa li a shololithwa komwaalu gwaalumentu taya mono omagumbo.
“Nani otandi tsu kumwe naashoka tashi ti, “Onakuyiwa onkiintu”,’’ta popi ngaaka.
Endjala naye okwa kumagidha aalumentu ya kale taya longitha oompito adhihe ndhoka hadhi vulu okugandja omagumbo, opo nayo ya ninge omayindilo.
Ta ti, kehe omukuluntu okwa pumbwa okukala e na olukalwa lwe mwene opo a vule okwwedhilila aakwanezimo ye.
vkaapanda@nepc.com.na