OSHAKATI
Ope na omapopyo geiyambapaleko paumwene ga kwatela mo gamwe gomomalenga gopamuthigululwakalo mElelo lyUukwambi – ano omalenga taga yaka po iimuna mbyoka ya kana. Iilonga yoludhi nduka ya kwatela mo oohedhi nooveta dhopamuthigululwakalo nomalombwelo, otaku tiwa otayi yi moshipala nokunkundipaleka oonkambadhala dhokulwitha uulunga/uufuthi wiimuna omolwoontamanana mokati komalenga shi nasha nokukala niimuna mbyoka ya kana. Otaku tiwa kutya omalenga pamwe nookapatashu yawo otaya kondjithathana shi nasha nuumwene wiimuna nokulundilathana kutya omalenga gamwe otaga kutha po iimuna oyindji unene shivulithe omakwawo.
Ngoka ta popiwa unene oye omusamane Johannes Kambonde Amukugo, ngoka a ulikwa kElelo lyUukwambi lyOpamuthigululwakalo a ninge omuhogongeliko gwiimuna mbyoka ya kana noku yi kondolola pamwe nomalenga nelalakano oku yi gandja kooyene ngele oya dhimbululwa. Otaku tiwa kutya Amukugo pamwe nomalenga gamwe omanene mElelo lyUukwambi oya ninga omukundu omunene peha lyokukandula po uupyakadhi wu nasha niimuna ya kana. Amukugo ota popiwa a kutha po shaa li paveta oongombe hamano oonkani nuumvo moshigunda shaRuth Petrus momukunda Othingo muuninginino wOshakati.
Petrus shika okwe shi tseyithile mOradio kutya ngele ope na omuntu a kanitha iimuna mbyoka e ye kegumbo lye opo e yi ile ko. Konima ashike yoowili mbali konima yetseyitho ndyoka, Amukugo okwa thiki pegumbo lyaPetrus nokukutha po iimuna mbyoka, ta ti oshinakugwanithwa she okushilipaleka kutya iimuna ayihe mbyoka ya kana oya tulwa miikaha ye omanga inayi gandjwa kooyene.
Amukugo okwa fala oongombe dhoka kegumbo lye kOshihenge, ookilometa ndatu pondje yaShakati. Amukugo okwa ka tala ko oongombe dhoka ye ina tseyithila mwene gwomukunda meme Justina Gabriel oshowo elenga enene lyomukunda Otuwala, Abner Amupini Nuule. Shika osha uvitha nayi omalenga gamwe ngoka ge uvite kutya Amukugo okwa dhina omalelo gayakwawo.
Oshiningwanima oshikwawo oshi nasha noongombe ndatu dha kuthwa komukunda Ombonde dhoka dha adhika tadhi lithwa kaasita yaAmukugo dhoka wo dha falwa kOshihenge. Aasita oya adhika ye na ombapila ya shainwa kuAmukugo momasiku 23 Apilili 2007 ndjoka wo ya monika koshifo shika.
Amukugo sho a pulwa a tye sha, okwe shi koleke kutya okwa pewa uuthemba kElelo lyUukwambi okutonatela iimuna ya kana. Okwe shi zimine wo kutya okwa kutha oongombe ntano ndele kadhi shi hamano okuza kOthingo.
Oongombe dhoka ota ti odha kana – ano kadhi wetike. Kakele ina vulu okuyelitha kutya oongombe dhika odha kana pamukalo gu li ngiini nomolwashike e ke dhi tala ko kegumbo lyaPetrus ngele ita vulu oku dhi tonatela kaa dhi kane. Otaku tiwa oongombe dhoka dha kana odhi li omugoyi, ihe oonzo dhi shi okwiinekelwa dhoka dha popiwa nadho koshifo shika otadhi ti dhimwe dhomoongombe dhoka odha falwa kegumbo lyasuwala yaAmukugo komukunda Ombonde.
Oonzo dhika otadhi ti Amukugo okwa holeka po oongombe a hala dhi ninge po dhe. Nonando Amukugo a ndopa okuholola kutya oongombe dhoka odhi li peni, ota popi kutya aaleli yalwe yopamuthigululwakalo mUukwambi ohaya yaka po iimuna mbyoka ya kana. Paye (Amukugo), aantu yamwe mboka taye mu lundile kutya okwa yaka po oongombe oyo lela ookanwamupombo/aafuthi yiimuna mboka ya pumbwa okupangulwa nokupewa egeelo. Amukugo ta ti: “Onda hala aalundili yandje ya yelithe mpoka pwa ya oongombe dhoonkani dhoka dha li momagumbo ngaashi mooHiskia Shigwedha mOniimwandi, Ugwanga Ndoongili pOshihenge, Maria Shigwedha pOnamula, mooNdjwalu pOnendongo naadhoka dha falwa kohambo yelenga enene Nuule kOpuwo, oshowo oongombe dhoka dha topolwa po komalenga gopamuthigululwakalo pegumbo lyIipinge Iilundu pOlupumbu.
“Natango ondi na omauyelele kutya ngoka a li mwene gwomukunda Ombonde ngoka a kuthwa muulenga pakathimbo, Lucas Johannes Tolondongele okwa holeka po iimuna yimwe kohambo ye yi li popepi nekango lyomongwa mUukwambi.” Oongombe mbali oonkani ndhoka dha li metonatelo lyomusamane Ndahafa Petrus pomukunda Onegali moshikandjohogololo shaElim nadho otaku tiwa odha kana.
Pethimbo shomutumba gokomwedhi gwElelo lyUukwambi pUukwangula momasiku 30 Mai 2007, oshinima shoongombe oonkani okwa li sha etwa po komalenga ga geya okuza moshitopolwa Otuwala, ngoka kwa li ga hala okuuva kutya omolwashike Omunashipundi gwElelo lyUukwambi, Elenga Enene Herman Iipumbu a tuma Amukugo komikunda dhawo a ka tale ko oongombe ye inaa kundathana nayo.
Oshinima shika osha etele okalamauka mokati komalenga omanene mUukwambi, ngoka kaga li ga hala shi popiwe poshigongi shoka. Oshinima shoka osha kuthwa mo manga momutumba sigo taku ka ningwa etseyitho.
Oshinima oshikwawo oshi nasha nomakonakono taga ningilwa amushanga gwElelo lyUukwambi, Maria Angungu ngoka taku tiwa okwa ka tala ko ongombe yimwe yonkani oonkiintu kooAmukugo kOshihenge oshowo yimwe kelenga ndyoka opo lya langekelwe mOlwani moshitopolwahogololo shaElim, omusamane Shumba Endjala ngoka taku tiwa naye oha ka tala ko oongombe dhoonkani momukunda gwe ndele kaku shiwike kutya odhi li peni.
Natango otaku popiwa oshinima shoontamanana dhi nasha nelangeko lyelenga mOthika, Abrahama Kamutsheetha Iipumbu, ngoka a li miikundaneki omathimbo ga zi ko konima sho aanamukunda taya ti oye mu thiminikilwa ongamwene gwomukunda Othika komukwanezimo lye Elenga Enene Herman Iipumbu.
Omapopyo ngoka gokudhengela ondhi pesho shi nasha niimuna mbyoka ya kana inaga guma ashike Uukwambi, ihe oga lopotwa wo momalelo galwe gopamuthigululwakalo ngaashi, momikunda dhomOndonga, Uukolonkadhi, Ongandjera, Uukwaluudhi, Oukwanyama, Okalongo nOmbalantu.