NDIYONA
Aawiliki yopamuthigululwakalo moshitopolwa shaKavango otaya indilwa nesimaneko enene opo ya pitithe oompango dhoka tadhi ka keelela aanamikunda opo kaa ya fike we omakuti – ano omapeya ngoka haga hanagula iimeno nokushundula ongushu yomidhongoloko. Mokupopya poshituthi sheegululo pambelewa lyoKhaudum National Park (oshikunino shiinamwenyo) pOndiyona metitatu lya zi ko, Kansela gOshitopolwahogololo shaNdiyona, Sebastian Karupu peha lyaNgoloneya gOshitopolwa shaKavango, John Thighuru, ota ti omapeya oga ninga omukundu omunene moshitopolwa, unene pethimbo lyokwenye. Ngele uupyakadhi womapeya owa tsikile pwaa na eyomoshipala, pauyelele waThighuru, omindilo dhika otadhi ka hanagula po thilu omidhingoloko oshowo oKhaudum National Park. Natango eindilo olya ningwa kUuministeli wOmidhingoloko nUutalelipo okundungika aakwashigwana kombinga yomilanduveta dhoka dhi li po okukaleka po oonzo dhopauntshitwe oshowo esimano okukaleka monkalo ombwanawa oonzo dhoka. “Okupitila mepashulo ndika lyoshigwana, aakwashigwana yetu otaya ka kwathela uuministeli okukaleka po oveta nelandulathano. Otu na iiningwanima yiiponga moka oonkalamwenyo dhaakwashigwana dha faalelwa kiinamwenyo yomokuti sha za ashike kompumbwe yiikonga yepashulo lyaakwashigwana yetu shi nasha negameno lyiinamwenyo,” osho a tsu omuthindo. Oshikunino shiinamwenyo Khaudum National Park osha uthilwe paveta ongOshikunino shIinamwenyo momumvo 1989, nokutulwa pamuthika nguka muFebuluali nuumvo. Mokutulwa pomuthika gOshikunino shIinamwenyo, omudhingoloko niinamwenyo ayihe moshikunino shika otayi kala nokugamenwa opo yaa longithwe nayi. – Nampa.