Auleria Wakudumo
OSHAKATI-Omuprima woshilongo Elijah Ngurare okwa holola kutya omaliko oshilongo okwa pumbwa okutukulwa shi fike pamwe moitukulwa aishe yoshilongo.
Omuprima edi okwe di holola pefimbo ta yandje oshipopiwa shaye shedimbuluko lefiku lemanguluko Olomakaya mokapale komaudano mOshakati.
“Omaliko okwa pumbwa okutukulwa shi fike pamwe opo keshe omuNamibia a mone ouwa wemanguluko loshilongo,” Ngurare ta holola ngaho.
Omuprima okwa ti moule womukokomoko weedula 36, epangelo ola andjakaneka olusheno modoolopa nomomikunda, okutwala omeva Mayela moshiwana, eepate ouhaku naikwaob ihapu moshiwana.
Nande ongaho, omuprima okwa ti natango epangelo olina okutula ombuda moshixwa opo li kwashilipaleke kutya exumokomesho ola hangika moNamibia.
“Ohandi pangola unene elelo lodoolopa yaShakati eshi la kala tali longo noudiinini okukwashilipaleka kutya ola yandja eenhele domalukalwa kovakwashiwana. Eshi otashi tu kumwe noNational Development Plan itihamano (NDP6) oyo ya tulwa moilonga kepangelo,” Ngurare ta ti ngaho.
Omuprima ina tangumuna ashike osho epangelo la ninga ndele okwa dimina kutya natango oshilongo osha taalelwa komashongo mahapu.
Okwa ti epangelo olina omangela yokuwedela okanala Etaka kashene netale Oponono. Okwa ti eshi otashi ningwa opo ku kwafelwe oimuna oshoyo ounamapya pokati bbkoshitukulwa shaMusati noshitukulwa shaShana.
Ngoloneya woshitukulwa shaShana Hofni Iipinge oye a tambula ko ovaenda.
Ngoloneya okwa holola kutya edimbuluko lefiku lemanguluko moitukulwa aishe neudo otali holola kutya oshilongo otashi ende nokuxuma komesho.
“Elunduluko eli nali tu dimbulukife kutya atushe otuna oshinakuwanifwa shokukwashilipaleka kutya otwa tula oukuni kumwe opo tu yambule po eliko, ounamapya Naishe moshilongo,” Ngoloneya ta holola ngaho.
Iipinge okwa ti oshitukulwa shaye otashi twikile okulundulula nokutwala omayakulo moshiwana, okuyandja ouyelele kovanyanyamaulu, nekuxuma komesho. Elenga lakula lUukwambi osho yo omunashipundi womalelo opamufyuululwakalo Aawambo Herman Ndilimani Iipumbu okwa holola olupandu kOmupresidente Netumbo Nandi-Ndaitwah nepangelo alishe eshi la ninga etokolo opo efikub lemanguluko li dimbulukwe moitukulwa aishe.
“Eshi otashi yaandje omhito kwaaveshe unene tuu ovanyasha nounona opo va holoke, okudimbuluka nokulihonga efiku eli la fimana mondjokonona yaNamibia,” iipumbu ta ti ngaho.
Elenga ola fatulula moule kutya efiku lemanguluko oshike nokudimbulukifa ovanyasha nounona efimano lokulidimbuluka.