ONGWEDIVA – Aakuluntusikola osho wo aalongi moshitopolwa shaShana otaya nyenyeta eyindjipalo lyomalimalima moongulu dhosikola, shoka taya ti ohashi piyaganeke nokutula moshiponga uundjolowele wawo. 

Oosikola dha thika 100, odha lopotwa dhi na oogulu dhimwe dhi na omalimalima moombuli. 

Sha ikolelela kehangano lyuundjolowele World Health Organisation (WHO), omalimalima ohaga vulu okutaandeleka omikithi dha yooloka uuna ge ya mekwatathano naantu. Moonkundathana naakuluntusikola osho wo aalongisikola yamwe moshitopolwa shaShana mboka inaya hala omadhina gawo ga popiwe oshoka oya gandwa yaa popye niikundaneki, oya ti, oye li mumwe nomalimalima. “Oombuli dhoongulu otadhi zi ashike ekudhilo lyomalimalima, shoka hashi piyaganeke eyitulemo lyaalongwa osho wo lyaalongi,” taya nyenyeta ngaaka. 

Taya hokolola kutya omalimalima ohaga thigi oongulu dha kaka nonyata shoka hashi ya pe iilonga kehe esiku ongula omanga inaaya tameka nootundi. Aalongi oya ti, oongulu odha nika ezimba ewinayi, onkalo ndjika oya kakeka oongulusikola dhawo. 

“Onkalo ndjika otayi mbandameke wo natango aalongwa mboka inaaya kala nale mehala limwe nomalimalima, kashi li nando omondjila,” ya ti ngaaka. 

Omulongi gumwe natango okwa popi kutya onkalo ndjoka oya nayipala, oya kala nokunyenyeta koombelewa dhelongo ihe kapena omakwatho gasha. 

Ta ti, onkalo ndjika oya kala ethimbo unene, shoka tashi vulu okukwatitha aalongwa komikithi, ta gwedha ko kutya aantu oye na iipa yi ivule. 

Omukuluntu gwelongo moshitopolwa shaShana Pauline Shapumba okwa ti, oombelewa dhe odhi li metifa okukandula po uupyakadhi mboka. 

“Okwa li twa gandja omalombwelo kiikandjo yelongo ayihe mOshana opo yi tume omisholondondo dhoosikola dhi na omalimalima opo oosikola ndhoka dhi pombelwe, shoka sha li sha ningwa,” ta popi ngaaka. 

Okwa yelitha kutya oosikola ndhoka odha tulwa metengenekothaneko lyoshimaliwa shomumvo26/27, opo dhi ka pombelwe omanga dhimwe tadhi ka opalekwa mpoka tapu monika nayi. 

-vkaapanda@nepc.com.na