OKAHAO – Aantu omayovi ya holoka esiku lyemanguluko oya holola euvo nawa sho ya tyapula esiku ndyoka nawa ngaashi naanaa kwa li ya hala noya tengeneke.
Mboka ya yi moonkundathana noshifokundaneki shika oya ti kOkahao kwali ko ngeno wa mono omalongekidho giituthi sho haga niingwa.
Esiku lyemanguluko ndyoka hali dhimbulukiwa aluhe momasiku 21 malitsa, moshitopolwa shaMusati nuumvo olya dhimbulukilwa kEhao Cultural Expo Centre mondoolopa yOkahao. Maria Shaanika gwomimvo 34 a yambukile komukunda Otamanzi okwa ti ina tyapula nale emanguluko ngaashi lyonuumvo.
“Iinima ayihe oya longekidhwa nawa, okutameka kehala mpoka pwa dhimbulukilwa, ka tuli momutenya, oprograma kayishi onde, iikulya oya topolwa nawa, ayihe oya enda nawa,” ta popi ngaaka.
Shaanika okwa ti ota pandula epangelo sho lye ya longekidhile nawa opo ya tyapule nawa esiku ndyoka.
Samuel Ekandjo a za komukunda Iikokola kUukwaludhi okwa ti okuuvite nawa oshoka esiku olya enda nawa.
“Okabaki nokunwa onda pewa kapena omakwiyunguto ga sha. Emanguluko otwe li tyapula shili,” ta imemeha.
Sylvia Thomas a za kOutapi okwa ti ina epeka omahooli ge oshoka okuuva ombili.
“Ondjokonona yemanguluko otweyi dhimbulukithwa nawa, otwa pewa omayele omawanawa oku za kaaleli se natango otwa londodhwa,” ta pandula ngaaka. Aanona yosikola oya li yuudha ehala ndyoka yena uupandela woshilongo peke. Oyendji yayi moonkundathana naKundana oya holola nkene yuuvite noyuuviteko shoka shali sheya fala kEhao esiku ndyoka.
Omambesa oga li ga tutu oshigwana shika tyapulile pamwe esiku lyemanguluko. Aaleli yoshilongo oya li ya topolelwa iitopolwa moshilongo. Minista gwomauyelele nomakwatathano gopaungomba Emma Theofelus okwa popi kutya Namibia okwa gwanitha omimvo 36 dhemanguluko, onkene osha simana okundjokonona shoka sha holoka ethimbo oshilongo sha li muukoloni nankene sha manguluka osho wo mpoka sha thikama nena.
“Esiku ndyoka hali dhimbulukiwa nokutyapulwa omolwemanguluko lyoshilongo, oha li simanekwa omolwomapendafule ngoka ga hulitha sho taga kondjele oshilongo shi manguluke osho wo okutumbaleka mpoka oshilongo sha thikama nena,” ta fatulula ngaaka.