Taimi Haihambo
Ovaunganeki nova kwateli komesho vOmungwelume festival ova holola kutya ova tameka nale omalongekido omalihafifo omodoolopa yavo okomudo, nova hala ashike ovanyasha va tameke okutula kumwe oufilinga vavo opo ova dule okukeshiliningila.
Umwe womwaavo ve kwetele oshindigili komesho, David Jeremia a shiivika nawa nedina “Daves ATM” okwa ti omalihafifo okwa teleelika aka kaleko okudja mo18 – 21 Desemba kOmungwelume.
Jeremia okwa yelifa kutya elalakano loku eta omalihafifo aa kovanyasha, oku yandja omhito yokulinyangela, unene tuu ava vehole ongeshefa, oku li kufa ehandu lekaanokono kwaava opo vashanga oilongwa yavo, oku eta ovanhu pamwe voo vadule oku hafela pamwe, oshoyo oku eta omwakwatafano awa pokati kovanhu vopomudingonoko.
Neudo vati ota ku ka kala kuna omalihafifo a kwata moiti, ngaashi omafiyafano okakadona dingi mOmungwelume, omalihafifo opashinanena, opamufyuululwakalo, oshoyo ovashiki veengalo oku dilila koitopolwa ya yooloka. Okwa ti natango oikulya oshoyo oikunwa yomaludi aeshe nayo oko tai kakala tai landifwa. “Otwa telelela yoo ovatalelipo okudja keenhele nokoitukulwa yayooloka veuye vakufe ombinga,” ta ti. Okwa twikila kutya okuetapo oshitufi sholudi eli kashifi lela oshiima shipu, shaashi vati otava longifa ashike oshimaliwa okudja meendjato davo, molwa ohole ei venine ovanhu vomomudingonoko. “Fiyo opapa otwa mona ngaho omayambidido apa naapenya ashike natango otwa pumbwa nohatu indile ekwafo kovanangeshefa vopomudingonoko vayambidide moku eta oshivilo eshi omwenyo,” Jeremia ta ti.
Omalishangifo okakadona dingi natango vati otaa pula komesho, nefiku laxuuninwa omo 30 ya Novemba, nomalishangifo ota aningwa oku dilila 081 8484 8512.
Jeremia okwa ti ota indile oshiwana ashishe shopomudingonoko shi uye komalihafifo.