OSHAKATI – Elelo lyondoolopa yaShakati nando lya kala nokutembundhila omalukanda kehala limwe kOnawa, olya ti omalukanda ge li gatano itaga ka tembudhwa.
Omalukanda ngoka itaaga tembudhwa ogo Oneshila, Okandjengedi, Evululuko, Ompumbu oshowo ombinga yimwe yUupindi. Omahala ngoka otaga ka tulwa ashike pomuthika gwondoolopa.
Mayola gwondoolopa yaShakati Leonard Hango, okwa ti, omalukanda agehe mOshakati, kage na oopolota dhi na uumwene wevi. “Moomvula ntano twa taalela otatu kala twi ipyakidhila nokuyambula po omalukanda mOshakati, oku ga tula pomuthika gopandoolopa,” ta fatulula ngaaka.
Ta ti, oya tameka nale nOmpumbu, nuuna ya mana otaya landulitha ko omalukanda ngoka ga hupu ko.
Ta gwedha ko kutya, aakalimo yomomalukanda ngoka taga ka tulwa pamuthika gondoolopa, paife oya pewa epitikilo oku ka ninga omayindilo gwokupewa oondokumente guumwene wevi.
“Eyindilo ohali ningwa uuna mwene gopolota a futu N$30 Okumona ondokumente we hala lye,” ta ti ngaaka.
Hango okwa fatulula kutya ngaashi ehumokomeho lya fuma ko, ondokumente ndjoka oya simana kukehe omukalimo a kale e yi na oku mu yambidhidha noompumbwe dha yooloka monakuyiwa.
“Otwa li twa ndhindhilike kutya otwa kala nokuyambula po ondolopa yaShakati ayihe opo yi kale yi li mefano ewanawa, sho ooshoka twa tembudhile omalukanda gamwe komahala hoka ku na aantu yena iiyemo iiyemo yi li hwepo oshowo mboka yaa na nande nande,” ta popi ngaaka.
Ta popi ta ti, shika natango oye shi ningile ombinga yimwe yUupindi. Ta gwedha po ta ti, oye li momusholondondo, onkene kehe olukanda lwa hupa ko mOshakati ota li ka mona omauwanawa oshowo eyambulepo.
Olukanda Evululuko mOshakati olwa tulwa nale pamuthika gwondoolopa, paife talu ithanwa Extention 15.
Omupitithi gwomauyelele melelo lyondoolopa yaShakati Katarina Kamari ota ti omalukanda ngaashi ombinga yimwe yolukanda lwaPohamba olwa tulilwa po nale omayakulo gamwe, ngaashi olusheno nomeya oshowo omayakulo gamwe gamuni.
“Otandi kumagidha oshigwana kaashi dhengele we oombashu momalukando moka, oshoka elelo lyondoolopa olya yalula nokumeta nale lya mana, naashoka otashi shunitha iilonga yawo monima,” ta popi ngaaka.
vkaapanda@nepc.com.na
Ta indile aakalimo yomomalukanda moka ya kale taya lopota mboka taye shi ningi.
“Ngele omwa kala mwa mwena, mwa tala iiningwanima ya tya ngaaka tayi holoka popepi nane, nena olukanda lweni nalo otalu shuna monima okuyambulwa po okutulwa pomuthika gwopandoolopa,” Kamari ta fatulula ngaaka.
Caption: Ehumokomeho… Omalukanda ashike gatano taga ka tulwa pamuthika gwopandoolopa.
Efano: Victoria Kaapanda