ONGWEDIVA- Ngoloneya woshitukulwa shaHangwena Sebastian Ndeitunga okwa ti oshitukulwa shaye osha taalela eshongo linene lomambakumbaku epangelo taa fiki koshiwana efimbo lokupulula la pwa po.
Okwa ti ovanhu vamwe ova ninga omaindilo omambakumbaku okudja omudo wa djako ashike fiyo opaife inaa fika a komapya avo.
“Paife otu li metifa lodula tai loko nawa, eli olo efimbo liwa kovanhu ve li tule mo okulonga momapya,” ta ti.
Ngoloneya okwa ti omambakumbaku amwe oha teka osho shi li eshongo linene koshiwana molwashi iha dulu vali okukapulula.
Omudo keshe ouministeli woumanapya oha yandjeneke eembuto nomambakumbaku koshiwana koitukulwa ya yooloka.
Omambakumbaku oha pululile ovanhu ovo tava nyengwa okufuta ondado yopombada noku na ondado i li pedu.
Kansela woshilandjohoololo shaEengodi Protasius Neshuku okwa ti ombelewa yaye lopotelwa koshiwana kombinga yeembuto ta fiki kovanhu kwa lata.
“Moshikandjohoololo shange omu na omaumbo amwe a taalela omashongo okuhe ne eembuto,” ta ti.
Kansela woshikandjohoololo shaNesi Festus Petrus okwa ti ovanhu ohava kala ve na eengodi da dima ile itava nyamukula eengodi davo ngeenge tava dengelwa kovanambelewa kouministeli wounamapya.
“Omunhu ngeenge oku na ongodi ya dima pefimbo ta dengelwa komushingi wambakumbaku naashi otashi eta mbakumbaku a ka pulule komaumbo amwepo,” ta ti.
Petrus okwa kumaida ovanhu va ninga omaindilo oombakumbaku opo va kale alushe vena eengodi da patuluka.
Omupopiliko mouministeli wounamapya, omeva netululo omadu, Simon Megameno Nghipandulwa okwa koleka ta ti ouministeli owa didilika eshongo lombakumbaku taa teka ashike omukundu ou otau kandulwa po diva.
Nghipandulwa okwa popya ta ti omambakumbaku omafimbo amwe oha fiki kwa lata shaashi omwaalu wovanhu va ninga omaindilo ohau kala muhapu.
Okwa lombwela oshiwana opo shi kala tashi kwatafana neembelewa dounamapya di li koitukulwa ngeenge sha didilika mbakumbaku ta kwata efimbo lile okufika.
Okwa weda po ta ti osha fimana opo ovanhu va talele po eembelewa dounamapya koitukulwa okupula omauyelele kombinga yeembuto odo hadi yandjwa kepangelo noshoyo omayakulo amwepo.