Charles Ndeumane
Omupresidente gwaNamibia Nangolo Mbumba okwa ti omananathano momalelo gopamithigululwakalo otaga teya po einekelo maaleli yopamithigululwakalo ndyoka lya kala po okuza nale.
Mbumba okwa popi ndhoka momumba omu-25 gwaaleli yopamithigululwakalo ohela moshilandopangelo.
Okwa ti aaleli yopamithigululwakalo oya kala ya inekelelwa okukaleka po ombili nelandulathano, ongushu yomithigululwakalo, elongelokumwe oshowo esimaneko ashike ngashiingeyi muuyelele womananathano ngoka taga inyenge momalelo gopamithigululwakalo moshilongo, aantu otaya ningi ya kanithe einekelo momalelo gopamithigululwakao.
“Omakondjithathano ngoka itaga teya po ashike ombili nuukumwe pokati kaaleli yopamithigululwakalo ashike olundji ohashi eta opo epangelo lyi idhope mo moka lyi na oku ongitha iimaliwa yoshigwana mbyoka ya li tayi vulu oku ongithwa iilonga yimwe yi ili ngaashi mehumokomeho, elongo, uunamiti, okukondjitha oluhepo noohepele.
Ashike ngashiingeyi ethimbo neliko otayi longithwa mokukandula po omaudhigu ngoka moompito odhindji taga vulu okukandulwa po ngele aantu oya landula oompango dhomalelo gawo,” Mbumba ta ti.
Mbumba okwa tsikile ta ti omalelo gopamithigululwakalo naga itule mo moshinakugwanithwa shago shokuyambula po iitopolwa yago oshowo okukwatela po omithigululwakalo.
“Na tu ilongeni okutula ponomola yotango iilalakanenwa yetweni atuheni shi vulithe oku ula omauwanawa getu yene komeho,” omupresidente ta ti.
Manga epangelo tali kondjitha ondjala noshikukuta moNamibia, Mbumba okwa ti oshikukuta osha pindjala ngashiingeyi, shoka sha guma aantu oyendji.
Okwa indile aantu ya longele kumwe opo ya adhe esindano mokukondjitha ondjala noshikukuta.