Omupresidente Nangolo Mbumba okwa ti omandiki opaungomba okwa fimana molwashi ota yandje ounongo kovanyasha nokueta po eemhito doilonga.
Edi Omupresidente okwe di popya onghela pefimbo kwa li ta patulula endiki lopaungomba loKhorixas Vocational Training Centre moshitukulwa shaKunene.
Ovaleli vopapolitika, omalelo opamufyuululwakalo, ovanafikola okwa li vangudumana pefimbo lepatululo lendiki lipe lopaungumba.
Ovanafikola va dja keefikola da yooloka moshitukulwa shaKunene ova hafa nokupandula epangelo eshi la eta endiki lopaungomba moshitukulwa shavo.
Naashi ota shi eta opo ovanafikola vaha ye va li koitukulwa yokokule okukelihonga komandiki opaungomba.
Endiki e li ota li ka yandje eetundi momaifano a yooloka opaungomba ngaashi oku li hongela okupangela omalusheno, okutunga, okuxwikila oitenda noshoyo tuu.
Mbumba okwa pula ovanyasha opo longife omhito yokukelinga komaundiki opaungomba nelalakano lokumona ounongo.
Okwa weda po ta ti ovanyasha vamwe ova shitwa ve na ounongo okudja kedalo, naashi osha fimana opo vaye komandiki opaungomba.
“Omandiki opaungomba otaa lwifa ondjala nolohepo. Omunyasha ngeenge okwa mono ounongo ta dulu okutota po ongeshefa yaye noshoyo okuyandje eemhito doilonga kovanyasha vakwao.,” Mbumba ta ti.
Okwa ti epangelo ota li twikile okutunga omandiki opaungomba noshoyo eefikola shaashi okwa fimana moshilongo.
“Ovanafikola ova pumbwa ehongo molwashi ehongo ola fimana. Oshilongo osha pumbwa ovanhu va longwa nove na ounongo momaifano a yooloka,” Omupresidente a weda po.
Mbumba okwa pula ovanafikola opo va talelepo endiki lipe lopaungomba nelalakano lokupewa ouyelele kombinga yeetundi domaifano taa e lihongelwa pendiki opo.
Omupresidente okwa pula omahangano opaumwene eeministeli da yooloka opo aa kale taa yandje eemhito doilonga kovanyasha tava di komandiki opaungomba.
“Ovanyasha tava komandiki opaungomba ova pumbwa oilonga opo va dule okumona ounongo wa wana kombinga yaa sho ve lihongela,” ta ti.
Okwa pandula elelo lodoolopa laKhorixas eshi la yandje onhele yedu opo pa tungwa endiki lopaungomba.
Minista wehongo lopombada, omandiki opaungomba Itah Kandjii-Murangi okwa kumaida ovanyasha ve li honge nelitulemo opo va mone ounongo wa wana nokudula okukatopolafana ounongo novanyasha vakwao.
Okwa ti ouministeli waye otau twikile okuyandjaneka oikwafifohongo komandiki opaungomba ayeshe moshilongo opo ovanyasha ve li honge noupu nokupewa ehongo longushu.
“Elalakano lokutunga omandiki opaungomba moshilongo okuyandja omhito kovanyasha ve li honge nokulongifa ounongo wavo,” minita ta ti.