KATIMA MULILO – Onkalathano yeyonuuko ndyoka ya kwatela mo elongitho nayi lyiikolitha niingangamithi mokati kaagundjuka yomoshitopolwa shaZambezi oyo yimwe yomiinima mbyoka ya etele eikwato pomutima omuulikwa presidente gwongungu yoAffirmative Repositioning (AR) Job Amupanda pethimbo a li ta popitha oshigwana komalukanda inaaga longekindwa moKatima Mulilo.
Amupanda okwa talele po omalukanda moka a ti okwa mono nkene aagundjuka ya iyethela omolwa elongithonayi lyiikolitha niingangamithi oshoka kaye na po sha shoka taya vulu oku ninga po yo ya waimine iinyangadhalwa mbyoka hayi vulu oku eta po sha moshigwna.
“Otwa yi le komalukanda ngaashi lyaDairy, Macaravan, nokoCowboy. Omalukanda agehe ngoka ondi ga shi. Ondali nda yemata. Onda adha ko aantu ya iyethela onkalamwenyo. Gumwe gwomuyo okwe ya kungame ta ti ‘Ita ndi ku holama oshoka nangoye omugundjuka nga ngame.’ Okwa lombwele ndje ta ti ‘ondi na uupyakadhi woku longitha iingangamithi, nesiku kehe oha ndi kala nda kolwa – nda nwa ndi ilandela ngame mwene nenge nda landelwa mo kaantu yalwe.’ Okwa ti wo ‘ethimbo limwe ohandi ka longa iilonga yuulingilingi opo ndi imonene oshimaliwa shoku landa iingangamithi,” Amupanda ta hokolola.
Ta ti omugundjuka ngoka okwe mu lombwele wo kutha oku li monkalo ndjoka ondhigu nando a pita Ondondo onti-12 niitsa 30. Ta ti omugundjuka ngoka okwa etha osikola no inaatsikila we opo a imonene onakwiiwa yi li nawa.
“Aalumentu naakiintu aagundjuka yamwe mboka ya valelwa noku putukila moshitopolwa shaZambezi oya lombwele ndje kutya oya iyethela onkalamwenyo oshoka kaye na sho haya ningi kakele koku nwa omalovu niingangamithi. Osha li tashi uvitha nai noonkondo. Moshito aantu mboka haya longitha iingangamithi ohaya kala ya holama. Ashike shoka osho twa adha mokati kaagundjuka [yokoZambezi]. Otu na oku ninga po shike opo tu kandule po omukundu nguka mokati kaagundjuka moZambezi nomoshilongo ashihe? Opu na oku kala pu na eyamukulo,” omuleli gwoAR ta ti.
Okwa ti wo okwa tala konkalo yoluhepo moshitopolwa unene momalukanda moka. “Oshipala sholuhepo osho owala to tsakaneke momalukanda moka. Oluhepo olwi iwetikile owala komalutu gaakiintu naalumentu mboka ya iyethela onkalamwenyo.”
Amupanda ta ti aagundjuka mboka oya li ya manguluka oku popya naye oshoka oAR ongundu ndjoka yilile po aagundjuka. “Oya ti ‘andola otwe ku tukagula nawa ngaashi hatu tuku aanapolitika mboka haye ya kutse. Anuwa oongundu dhilwe ohadhi ya ko komalukanda huka nuundhigu oshoka ngela odhe ya ko ohaku tiwa owala ‘voesek… inde ni… tse otwa vulwa’. Oominista nookasela ngele ya yi ko kaagundjuka mboka oha ku tiwa owala zwaa… ta shi ‘indeni’.
Pethimbo ta popitha oshigwana, ngoloneya gwaZambezi Lawrence Sampofu okwa kwashilipaleke oshigwana kutya etanga lyokukaleka po ombili otali longo pwaa na oluthuwo lyi shilipaleke kutya ope na ombili negameno.
“Iiikonga yokugandja uuyelele, nokutseyithila oshigwana kombinga yegameno, iimbuluma ya guma oongamba koombinga adhihe, eyako lyiimuna, omahepeko guukakwashikekookantu, elongitho nayi lyiikolitha niingangamithi osho wo iitopitha inaayi topa oya li ya ningwa,” Sampofu ta ti ngaaka.
-anakale@nepc.com.na