Minista woikwamina neenghono Tom Alweendo okwa ti ouministeli wavo itau ka yandja vali omikanda dihapu dokulandifa omahooli unene tuu meedoolopa shaashi oitaashi yomahooli oya ninga ihapu unene.
Okwa yelifa ta ti omikanda dokulandifa omahooli otadi ka yandjwa ashike peenhele opo pena omhumbwe yoitaashi yomahooli.
Alweendo edi okwe di popya Etitano pefimbo kwa li ta patulula oshitaashi shomahooli pambelewa shoTotal Energies kOkatana mOshakati.
Alweendo okwa ti okudja momudo 2018 ouministeli wavo okwa kala tau yandje omikanda dihapu dokulandifa omahooli onghee paife ova didilika kutya oovene veengeshefa domahooli oyuuyemo yavo oya shuna pedu shaashi ihava landifa vali nawa molwaashi oitaasshi oya ninga ihaou neenghono.
Okwa ti omudo okudja 2018 ouministeli owa yandje omikanda dokulandifa omahooli 87 osho paife sha eta moshilongo mu kale muna ovanhu 500 ve na omikanda dokulandifa omahooli.
Alweendo okwa weda yoo vali ta ti eengeshefa domahooli di li kombinga yokeengamba ngaashi Oshikango nOmafo nado odi na oyuuyemo ya shuna pedu shaashi iha di mono vali ovalandi vahapu molwashi ovanhu ohava ka landa omahooli oo haadi moAngola shihe li paveta.
“Elandifo lomahooli paumbudi ola shunifa pedu domahooli dihapu moshitukulwa shaHangwena onghee ohatu twikile okulongela kumwe nepangelo la Angola opo tu xulife po onghalo yomahooli taa landifwa paumbudi moNamibia,” ta ti.
Okwa yelifa ta ti Ovamibia ove hole okukalanda omahooli moAngola shaashi omahooli oku na ombilixa.
Moshipopiwa shaye mwene woshitaashi shomahooli pOkatana noku li yoo vali omukulunhu wehangano loNamshingo Investment, Paulinus Shilamba okwa ti elalakano loku tota po oshitaashi shomahooli okulwifa ondjla noluhepo tashi pitile mokuyandja eemhito doilonga kovakalimo vomomudingonoko waKatana.
Okwa ti ponhele opo opena ovanangeshefa va yooloka hava hiile tava ninga eengeshefa da yooloka ngaashi okapana, eendingosho, onhele yokukoshela eetuwa nonhele yokukululilwa nokupanda noshoyo omayakulo a yooloka. Shilamba okwa ti ovanhu 31 ova kutwa mongeshefa yaye omanga ovanhu 22 ova kutwa koovene veengeshefa ovo hava hiile ponhele yaye.