Paulina Ndalikokule
OSHIKANGO – Aakwashigwana yaNamibia naAngola ngashiingeyi otaya vulu okuya nokuza miilongo mbika iyali ethimbo kehe sha landula epatululo lyuupitilo woongamba dhOshikango – Santa Clara mEtitano.
Ngoloneya gwOhangwena Sebastian Ndeitunga pethimbo lyoshituthi shepatululo lyomapitilo goongamba okwa ti epatululo ndyoka ota li ningwa sha landula etsokumwe pokati komapangelo Namibia naAngola moonkundathana dhaningilwe mo2021.
Ta ti epatululo ndika otali ka hunitha pevi iimbuluma, okuhwepopaleka omayendathano osho wo okuhumitha komeho omahupilo.
“Okupatulula oongamba ndhika esiku alihe ota shi holola onkantu yasimana yomapangelo ngaka gaali oku longela kumwe mokondopeka omakwatathano gopapolitika nogomahupilo,” Ndeitunga a ti ngaaka.
Ta kumagidha aantu ya hulithe po okuyakela omahooli osho wo iilandithoma okuza moAngola okuya moNamibia oshoka otashi hunitha pevi iiyemo yoshilongo.
Ndeitunga okwa tsu omukumo omapangelo ngaka ga tsikile oku ninga oonkundana opo yavule oku patulula oongamba odhindji.
Minista gwiipambele yomagumbo, omayendathano negameno Albert Kawana poshituthi shoka okwa ti epatululo lyoongamba ndhoka otali ka hwahwameka omahupilo miilongo mboka.
Ta ti opo iilongo ayihe iyali yi vule oku tyapula omawuwanawa nga ngoka, Namibia na Angola otaa kundathana oku patulula oongamba dhilwe miitopolwa Kunene, Kavango East osho wo Zambezi.
“Onda itayela kutya oku tula po omawufathano gwokulongitha uumutse wiilongo pehala lyaantu taya longitha omikanda dhomayendathano ota shi ka kwathela opo aakwashigwana yiilongo mbika iyali ya endathane pwaana uupyakadhi,” a ti ngaaka. Ta ti mboka ha ya hingi omaloli oye shiningilwa oshipu sho ita ya kalala we pooha dhopate moku tegelela oongamba dhipatululwe. Oshiwike sha zako omupopiliko gwRoads Authority Hileni Fillemon okwa indile aahingi yomaloli kaya thikameke we omaloli pooha dhopate pomahala gangambekwa.
Minista gwikwameni moAngola Eugino Laborinho okwa pandula epatululo lyoongamba dhoka. Ta ti ota shi holola esindano lyelongelokumwe pokati komapangelo osho wo ehumokomeho ta li hwepopaleka iilongo yokuumbugaantu waAfrika.