Auleria Wakudumo
ONDANGWA – Minista womayambulepo omikunda needoolopa James Sankwasa okwa kunghilila elelo lodoolopa yaNdangwa opo li xulife po okukala itali landula omilandu odo da tulwa po kouministeli nokepangelo.
Eshi Sankwasa okwe shi holola eshi vati elelo lodoolopa yaNdangwa la tula po kulo vene ondjabi yomukulunhuwiliki wavo Ismael Namgongo. Minista okwa ti eshi osha ningwa elelo lodoolopa yaNdangwa inali pewa epitikilo okudja kuminista.
Minista edi okwe di holola pefimbo ta talele po eeproyeka da yooloka depangelo mOndangwa Etine.
“Ondi shi kutya omwa li mwa shangela nge ombilive, tamu pula epitikilo lokuwedela ondjabi yomukulunhuwiliki ashike inamu teelela enyamukulo ngeenge osho ile hasho, omwa ninga ashike etokolo kunye vene,” Sankwasa ta holola ngaho.
Omunashipundi mokakomitiye kewiliko lodoolopa yaNdangwa Julia Kapiya okwa fatulula kutya elelo ola ninga etokolo eli opo li kwatele po omukulunhuwiliki oo a li a mona oilonga pamwe pelili noya li ya hala oku mu futa ondjabi i li pombada i dule oyo a li ha mono nale. “Katwa li twa hala okukanifa omunandjungu wetu nonghene otwa ninga etokolo eli. Omukulunhuwiliki okwa li tetu fiye po ngeno inatu katuka onghatu oyo,” Kapiya ta fatulula.
Kapiya okwa holola yo kutya ewedelo londjabi yomukulunhuwiliki inali ningwa ashike momumbwalangadjo ndele ova faafanifa yo eendjabi dovakulunhuwili mOngwediva oshoyo Oshakati manga inava ninga etokolo la xuuninwa.
Nande ongaho, Minista okweva takela omunwe kutya kapena ou ena okuninga etokolo olo ngeenge inali pitikwa okudja mombelewa yaye. Sankwasa okwa indila elelo opo li ka ninge eindilo lili mondjila, tali ulike etomeno kutya omolwa shike va wedela ondjabi yomukulunhuwiliki.
Omalweendo
Minista natango okwa pula elelo lodoolopa yaNdangwa li fatulule kutya osha enda ngahelipi opo va kale tava longifa oshimaliwa shokweenda shi li pombada meereta di dulife eereta odo hadi longifwa kepangelo nokomalelo edoolopa makwao. Sankwasa okwa ti olopota yandja kombelewa yokutala ouyuki wokulongifa oshimaliwa moikondo yepangelo oya holola kutya elelo lodoolopa oleya po nomulandu walo oo hava landula ngeenge tava talele po eenhele dimwe.
Sankwasa eshi okwa ti inashi pitikwa nasho kouministeli.
“Eshi itandi ke shi lididimikila. Okudja nena apa onda hala mwa hovela okulongifa omulandu oo wa tulwa po kepangelo,” Sankwasa ta takele omunwe.
Sankwasa okwa pula yo elelo lodoolopa yaNdangwa li fatulule kutya omolwashike inali yandja olopota yeedjo doimaliwa yoikondo yepangelo oshoyo eengeshefa.
Okwa ti elelo lodoolopa yaNdangwa ola dopa okuyandja olopota oyo okudja muApilili fiyo opaife. Okwa weda po ta ti ombelewa yaye oya teelela natango olopota oyo tuu oyo.
“Elalakano lokupula olopota ei osheshi kutya momalelo edoolopa amwe, ovakwashiwana ohava ningi oihakanwa yokukufwa oipumbiwa yefiku keshe ngaashi omeva nolusheno. Oto hange eumbo lomukulupe lina eedjo domeva N$1 000 ashike okwa tetwa ko omanga to hange eengeshefa dimwe dina eendjo omayovi nomayovi mahapu ashike otadi twikile okungeshefa,” Sankwasa ta fatulula nonyati.
Minista okwa holola kutya olopota ei otai ka yandja oumbangi nokunyana nghene tava yandje omakwafo koshiwana, eengeshefa nokoikondo imwe. Elelo lodoolopa yaNdangwa ola indilwa opo li xulife po okuha landula eeveta neemhango depangelo. Elelo ola takelwa yo omunwe opo li fele okalambo okukufa omatokolo kulo vene inali kwatafana nombelewa yomayambule po omikunda nedoolopa. -wakudumoauleria@gmail.com