Auleria Wakudumo 

Nonande vahapu otava yolele ketayoo molweloolo loneudo, vamwe unene moitukulwa yokonooli ova dengwa pomutima shaashi oikunomwa yavo yahanaunwa po kefundja. 

Ehafo lovanafaalama ava neudo ola shituka enyeme, va dengwa pomutima eshi omapya avo a ya koshi yomeva konima efundja la fika momapya avo. 

Ovakwashiwana vomomukunda Onanhinda moshitukulwa shaHangwena ovo va tembukila keetenda ova holola kutya kave na elineekelo kutya otava kufa mo sha momapya neudo shaashi oikunomwa yavo oi li koshi yomeva. 

Tresia Shihoya, omukulupe weedula 71 okwa holola kutya okwa hovela okulima nomuloka wotete muKotoba naNovemba odula ya dja ko. 

“Onde liteteka okulima shaashi kwa li nda hala okumona mo oipalwifa ya wana neudo. Odula ya dja ko otwa xupa shokadila novatekulu vange shaashi katwa li tu na oilya mokaanda,” Shihoya ta ti. 

Shihoya okwa ti oshinyemateka unene okulima ndele to kala ino teya. Wa tala oilya ya tula ko ashike oya olela momeva.

Ovakwashiwana ova holola yo kutya kavena elinekelo kutya otava hange mo sha momapya shaashi kape na ou ta keelele oimuna momapya avo. 

Ndaitavela Nghiyolwa weedula 40 okwa holola kutya okwa efela oimuna yaye mwene mepya shaashi oikunomwa oya ninga nale nai. 

“Oshixwepo okuefa eendongi dange di lye mo oilya oyo yi li momeva shi dulife eshi tai hepa ashike. Oikunomwa imwe ngaashi omatanga, omakunde, eefukwa naikwao aishe oyo ihai yambuka po pedu oya olela koshi yomeva manga noimuna inatu i tula momapya,” Nghiyolwa ta ti. 

-wakudumoauleria@gmail.com