Omulumenhu weedula 29 okwa tambulilwa moshipangelo shaShakati eshi a monifwa oshiponga kukaume kaye pefimbo kwa li tave li ningi omashendjo peendingosho dopomukunda wavo.

Oshiningwanima osha ningwa mexuliloshivike komukunda Oshipumbu Shomugongo moshitukulwa shaShana efimbo loufiku.

Omukulunhu koshikondo shokukonakona oimbuluma moshitukulwa shaShana, omupedu komufala Fredrik Ndjadila okwa hokolola ta ti nakuninga oshihakanwa okwa li tave li ningi omashendjo nakaume kaye ou e li omufekelwa paife.

Ota ku hokololwa kutya ovalumenhu ava otameka okutanguna noku li tuka.

Omufekelwa vati okwa ya meni londingosho ndele ta kufa mo ekende lobiila nokudenga nalo mukwao komutwe.

Opolifi oya hokolola tai ti konima yefimbo omufekelwa natango okwa ta tula ekende ndele ta tete kaume kaye mepepe.

Ota ku hokololwa kutya omufekelwa natango okwa li a hala kutula kaume kaye monino nekende, ashik eina ya nasho komesho.

Okwa kwatwa po nomakonakono opolifi otaa twikile moshikumungu eshi.

Opolifi oya kumaida oshiwana opo shixulife po okutanguna ngeenge shi li meenhingo ile ngeenge sha nwa omalodu molwashi otashi eta oiponga ile ovanhu tave li dipaa. – fhamalwa@nepc.com.na