ONDOBE – Minista wehongo Anna Nghipondoka okwa ti omashongo oikwafifohongo itai mbi ovanafikola va pite nawa no itaa pu okukandulwa po.

“Omashongo oko aa kala,” minista ta ti.

Okwa lombwela ovahongifikola novakulunhufikola opo va longe nelitulemo no nande eefikola da taalela omashongo.

Edi Nghipondoka okwe di popya onghela komutumba pefimbo kwa li a shakena novakulunhufikola, ovahongifikola, ovanambelewa va dja kombelewa yehongo mOhangwena nosho tuu.

Elalakano lomutumba okukundafana kombinga yoidjemo yeendodo da yooloka okudja pondodo onhi-5 fiyo ondodo-12.

Minista ooe li pyakidila okuninga omitumba koitukulwa ya yooloka okwa popya yoo kombinga yomashongo a taalelwa keefikola nokutwa ovahongifikola vaha teke omukumo wokuhonga nondjungu.

Nghipondoka okwa kumaida ovahongifikola novakulunhufikola opo va longe kumwe okuyambidida ovanafikola tava nyengwa koilongwa. Ta ti epangelo ota twikile okuyambidida eefikola noikwafifohongo molwashi ehongo ola fimana.

Okwa lombwela ovakulunhufikola opo va longe noudinini okuningila ovahongifikola omapekapeko ngeenge tava wa nifa po oilonga yavo.

“Ovanafikola nava pewa oinyangadalwa ye lixwa po nelalakano lokulilongekidila omakonakono aa xuninwa,” ta ti.

Nghipondoka okwa ti osha fimana ngeenge ovanafikola tava piti opo va ye koiputudilo yopombada noku ka ninga ovanashilonga va yooloka.

Minista okwa popya ta ti ovanafikola nava longwe kombinga yoshilongwa yoLife Skills noshoyo kombinga  yomifyuululwakalo.

Omupedukulunhuwiliki wehongo moshitukulwa shaHangwena Palisha Ngulu okwa lombwela minista ta ti eefikola mOhangwena oda taalela omashongo ounona vOvaangola veha di meefikola davo, unene tuu eefikola di li kombinga yokeengamba.

fhamalwa@nepc.com.na