Opolisi moshitopolwa shaMusati oya lopota okanona komimvo ne ka si omeya sho ka gwile momuthima.
Omukwatakanithi koshikondo shokukonakona iimbuluma moshitopolwa shaMusati, Moses Simaho, okwa ti oshiningwanima osha holoka mehuulilo shiwike, momukunda Olwaadhiya moshikandjohogololo Onesi.
Ta hokolola kutya okanona hoka anuwa anuwa okali nayakwawo, sho yali ya tumwa yaka teke omeya komuthima, omanga omukuluntu ngoka ali nayo taka longa mepya.
Sho anuwa a galuka megumbo, okwali a dhimbulula kutya okanona kamwe keke po puyakwawo, nokwali a tondoka a katale komuthima gomeya.
Simaho ota hokolola kutya omudhimba gokanona okwali egwaadha momeya noku gukutha mo.
Okwa popi kutya nakusa okwa kolekwa kutya oye Shilikuyo Kamati.
Omakononakono gopolisi otaga pula komeho.
Onkundana ndjoka oya landula owala yaanona yaali yomimvo ntano ayehe, mboka ya hulitha oshiwike sha ziko sho ya si omeya momukunda Okagongo kAakwambashu momudhingoloko gOgongo.
Aanona mboka anuwa okwali taya litha iimuna, omanga aakuluntu taya longo mepya.
Okanona kamwe hoka kwali taka litha nayakwawo okali ka lopota kutya ya kwawo yaali oya ya momeya. Aakuluntu sho yaka thika oyaadha nale omidhimba momeya.
Opolisi onkene tayi tsikile okukumagidha aavali ya kale aluhe yeli aanona mokashoko oshoka iiningwanima tayi holoka moshitopolwa shaMusati otayi indjipala unene.
Ta yiti, aanona inaya thigwa we kuyo yene.
Oshiningwanima inaashifaathana, okanona komimvo mbali okasi oshiwike sha ziko sho anuwa kalika keyoka.
Otaku hokololwa kutya oshiningwanima shoka osha holoka momukunda Onanke moshitopolwa shaShikoto.
Gumwe gomaakwanezimo okwa hokolola kutya, yina yokanona okwali ayi a kateka omeya kopomba omanga athigi okanona ka kotha.
Sho anuwa ali a galuka, okwa mono eyoka lyongolonyoka mondunda, nasho a kambadhala okupendula okanona okwa nona kutya oka hulitha inyenge.
– vkaapanda@nepc.com.na