■ Lazarus Hakwaake
EENHANA – Omunashipundi wOhangwena Regional Council Erickson Ndawanifa eshi a lesha oshipopiwa shaNgoloneya wOhangwena mokupopifa ewiliko lOhangwena kombinga yaashi sha pondolwa po momudo woimaliwa yodula ya dja ko okwa popya kombinga yexumokomesho tali ende nakanini.
Moshipopiwa shaye Nghaamwa okwa koleka kutya Ohangwena oya talwa onga oshitukulwa eshi sha dengwa sha lila ngeenge tashi uya ponghalo yoluhepo, okuhe na oilonga, oshoyo okuhena ouyuuki ngeenge tashi uya pamayakulo onghalonawa yoshiwana. Okwa ti momudo woimaliwa ova longa ngaashi tava dulu opo va ete po eemhito dounangeshefa dovanyasha opo va ete po eemhito doilonga koitukulwa opo va kelele embobolekelo lovanyasha keedoolopa.
Nghaamwa okwa popya kutya Ohangwena fiyo opaife oi li konima ngeenge tashi uya pakutunga oiyakulifo ngaashi oiputudilo yehongo, ouhaku oshoyo omayakulo eepoplifi. Okwa ti okwa longifwa N$315 061 oku longulula olupanda londuda yovanaudu vokondje koshipangelo Okongo, oimaliwa i fike poN$982 000 oya longifwa okuwapekulula onduda yovanaudu voTB koshipangelo Engela, oshimaliwa shi dulife peemiliona N$3,17 osha longifwa okutunga okilinika yopokafimbo kOndobe, nokwa tungwa okakilinika kape kOkatope noimaliwa yeeshali okudja koGlobal Fund i dulife peemiliona N$17,56 nokakilinika kokOmauni okapwa taka longifwa nale oko ka pula oshimaliwa shi fike peemiliona N$15,55.
Kombinga yomakwatafano eengodi oshoyo oradio noTV, Ngoloneya okwa lombwela elelo kutya, TELECOM okwa tula po oiyakulifo yomakwatafano koikandjohoololo aishe. Okudja ngoo po 2G fiyo 4G nokwe lipyakidila noku wapekulula omakwatafano eshi sh emu pula eemiliona N$13. Kombinga yeenghono dolusheno, okwa ti eefikola ngaashi Iimbili kOmulonga, Oniingwena kEenhana oshoyo Oshifitu noLazarus Haufiku mOshikunde oda tulwa omalusheno oo a pula eemiliona N$8. Omanga eenhele ngaashi Onanghulo, Othilu, Etilashi, Oshomukwiyu, Oupili, Endiki lexumifokomesho kOuhongo, Londoloka, nofikola Hedimbi oshoyo Oushakeneno kOngenga ova pewa olusheno okupitila moshikefa shomaxumifokomesho shoikandjohoololo osho sha pula konyala eemiliona N$6, 43.
Kombinga yomatungo, okwa lombwela elelo kutya, opa tungwa oshashiona yopolifi komauni ya kosha eemiliona N$21, 75, okwa tungwa olupale , ongalashe neembelewa kendiki lomaxumifokomesho hali ufanwa Billy Mwaningange kEembaxu la kosha eemiliona di dule N$77,76.
Kombinga yeepate Ngoloneya okwa popya kutya opate ya kolongwa oya longwa noya pwa okudja koKatana-Endola-Onhuno kemiliona N$ 200 . oupate va kwata 12km ova longwa koshimaliwa shi fike N$830 000.
Nonande pa hangwa omafindano moinima imwe, Ngoloneya oku li a udifwa nayi komashongo oo a talela oshitukulwa ngeenge tashi uya paku tunga oiyakulifo. Okwa handukifwa unene kovanangeshefa ovo va pewa oilonga ndele tave i fiye ondjilakati. Okwa tofa mo kondadalunde oilonga yombilixa oyo ya longwa pakutunga eembelewa delongo mEenhana oshoyo etungo lokilinika kOnanghulo. Onhele yokutunga eembelewa delongo oya yandja mo 26 July 2016 noule wokutunga okwa li kwa fanekwa u kale eemwedi 33, nokwa teelelwa oilonga i kale yapwa kwa li momafiku 26 August 2019. Oilonga ei oya xulifwa po manga omolwa oilonga yihe na ongushu. Oilonga oi li peemwedi 26 osho shi li peepelesenda 79 deemwedi 33 doilonga i kale yapwa ashike oma tungo ota monika a nyika oshiponga nokovakalimo eshi pehe na nande oluumbo la dingilila onhele yokutunga, monena omatungo okwa ninga omulele woimuna, omutengenekwafaneko woimaliwa owa li u fike peemiliona N$60 noshimaliwa shi fike peemiliona N$12,5 osha longifwa nale neyokomesho lokumana etungo oli li peeepelesenda 20,8. Ngoloneya okwa popya kutya eepoloyeka odo mbali odo tadi fipi epangelo oimaliwa, nonande ina tumbula okapale ketanga a ka nako ka haulukwa luvali konima yeedula omulongo eshi ka tamekwa okutungwa. Nonande omatungo oo a fikama ka ku shivike kutya onaa ka tamekwe vali naini, nope niwe oumbada kutya otashi shiiva shi ka pule shihapu shi dulife eshi kwa li sha fanekwa. Otaku tengenekwa kutya ombelewa yelongo ohai futu shi fike pe N$ 400, 000 komwedi keshe osho hashi pula oshimaliwa shi fike ile shi dulife eemiliona N$4,8 kodula keshe.