Auleria Wakudumo 

Ongwediva- Eshi ofikola tai hovele noohembudangele tava shuna kenongelo, omaudano a yooloka oo aa kala kamana kandongo peemwedi dopehovelo ngaashi unene muJanuali fiyo omuFebruali lwaapo. 

Omaudano ngaashi okutondoka, omafiyafano pokati keengulu meefikola da yooloka, etanga lokeemhadi naali lomokambaba namaudano makwao oo unene haa danwa unene keefikola dokonooli yoshilongo. 

Omudeuli wovahongwa momaudano pofikola yaImmanuel Uahengo Daniel Henghono okwa holola kutya oudano ohau kaleke ouluvi wovahongwa ponhele, okulitula mo mehongo nokukala vena ohokwe okuuya kofikola. 

Henghono okwa ti mehovelo lomudo, ovahongwa ohava ningi omafiyafano opo ku talwe ovo hava dulu okutondoka kamana mofikola. 

“Okudja ofikola, ovahongwa ohaveli deulile ekufombinga olo hali kala efiyano pokati keefikola moshikandjohongo. Ounona ohava fiyafana po opo ku monike ovo tava dulu okukalela po oshikandjohongo pandodo yoshitukulwa,” omuhongi ta fatulula ngaho. 

Okwa ti ovahongwa ohava kufa ombinga mokutondoka ngaashi oinano ile naayo ixupi. 

Kakele kokutondoka, okwa ti pehovelo lenongelo opo yoo hava mono omhito iwa okuninga efiyafano pokati keengulu opo va tofe ovahongwa ovo tava dulu okukala hava kalelepo ofikola momaudano a yooloka. 

“Ovahongwa eshi tava dana, ohatu tofo ovo veshi okundana nawa, ngee etanga lokeemhadi, etanga lomokambaba, ondilimani nomaudano a wedwa po oo haa danwa pofikola opo,” ta yelifa ngaho. 

Ovahongwa ava ohava ka ongelwa ndele tava tungupo eengudu domaudano da yooloka odo hadi kalele po ofikola ouna pena oudano wonhumba keefikola dikwao ile koikandjohongo imwe. 

Omudo eshi wa hovela, otwa teelela eefikola konyala adishe di kale dina omaudano, ovahongwa tava tondoka. Omaudano meefikola okwa pitikwa novahongi ova tuwa omukumo kouministeli wehongo opo va pitike ounona va kufe ombinga momaudano. 

Okukufa ombinga ohaku kwafele ouluvi wokaana opo u fude po koihongwa voo va dule okudilaadila noupu oihongwa yavo. 

-awakudumo@nepc.com.na