OSHAKATI– Omaudhano gomahangano ga yama kepangelo taga ithanwa State-Owned Enterprise (SOE) Games oga tameke ohela kokapale koIndependence Stadium mOshakati.
Omahangano ge li 38, ga thikama po maaniilonga 2 500 otaga kutha ombinga momaudhano ngoka.
Omaudhano ngoka oga dhanenwe oshikando shotango momumvo 2016 noga etwa po nelalakano okukaleka po uukumwe pokati koo-SOEs. Aaniilonga ya za komahangano ngoka otaya kutha ombinga momaludhi gomaudhano ga yooloka ngoka ga kwatela mo etanga lyokoombadhi, etanga lyomokambamba, ekondjelo lyongodhi ku talike ngoka e na oonkondo, okumatuka o4x100m kwaakiintu naalumentu, nokwoshinano shookilometa 10, nokatanga komonete kovoli.
Omaudhano ngoka ga tameke ohela otaga yi sigo omomasiku 8Juni.
Moonkundathana nomunashipundi gwomaudhano ngoka Albert Khevare, omaudhano onkene taga tsikile okukoka, nokwa nyanyukwa oshoka aakuthimbinga otaya ulike ya ilongekidha.
“Nuumvo otwa tokola opo tu ningile omaudhano mpaka opo tu yambidhidhe oshitopolwa shaShana, unene ondoolopa yaNgwediva, ndjoka ya tseyitha omumvo gwa zi ko kutya oya ipyakidhila nokutunga okapale komaudhano kopamuthika gwoshinanena,” Khevare ta ti.
Ta gwedha ko kutya okweeta oo-SOE pamwe mOshana okwa lalakanena okutsa omukumo mboka ye na mo olunyala metungo lyokapale kaNgwediva opo ya tameke oku ninga ekwatathano nomahangano omakwao, yo ya mone eyambindhindho.
Khevare okwa gwedha ko wo kutya okapale kOshakati Independence Stadium okeli pamuthika gwoku ningilwa omaundhano ngoka.
“Monakuziwa otwali twiiyadha tuna omashongo gena sha nomahala goku ningila omaudhano ngoka, shoka olwindji hashi eta opo kaatu mane pethimbo, ashike nuumvo otu na omukumo kutya ota tu ka mana nawa, molwaashoka okapale kOshakati Independence Stadium oke na uupale wetanga lyomokambamba nota tu vulu wo oku dhana omaudhano galwe giili pokapale opo tuu mpoka,” Khevare ta ti.
Khevare okwa gwedha po kutya, kapu na iimaliwa yokupa aantu mboka taya ka sindana, omaudhano ogelile po owala okwiiuvitha nawa, aasindani otaya ka pewa owala omapapa nomakopi, taga ka pewa omahangano ngoka ga longa nawa.
“Itandi ithana aakalimo yOshana momiyalu ominene opo ye ye ya tale omaudhano noku i uvitha nawa,” Khevare ta ti. -Nampa