Omunambelewa omukuluntu mokomisi yomaudhano Freddy Mwiya okwa ti oondjila adhihe nadhi taalele konooli, omolwomaudhano goNational Youth, ngoka taga ka kala ko okuza momasiku 11 sigo 15 gaSepetemba nuumvo.

Mwiya okwa ti omaudhano ga yooloka ngoka otaga ka ningwa oshikando oshititatu notaga ka dhanenwa moshitopolwa shaShana muupale wa yooloka moondoolopa ndatu – Oshakati, Ondangwa nOngwediva.

“Omaudhano ngaka otaga ka kuthwa ombinga kaadhani aanyasha ya pita 2 000, okuza kiitopolwa ayihe 14 moshilongo, mboka taya ka ulika uunongo niitalendi yawo,’’ Mwiya ta ti ngaaka.

Omaudhano ngoka otaga ka kala omanene nokuniwe eyinekelo lya kola kutya otaga ka enda nawa opo ya vule oku ka totha mo omanyakwa dhingi taga ka kalela po oshilongo.

Minista gwomaudhano Agnes Tjongarero momushangwa gwa leshwa pehala lye okwa ti omaudhano ngoka otaga ningwa nelalakano lyokulongekidha aanawino ya vule okukakutha ombinga momaudhano taga ka kala ko mo2028, koLos Angeles Olympics.

“Otu na okukala tu na aakalelipo mboka taya ka vula okuyelula epandela lyaNamibia pombanda uuna ya sindana,” ta popi ngaaka.

Ta ti omalongekidho gomaudhano ngoka oge li metifa naayihe otayi ende nawa sigo oompaka. Ngoloneya gwoshitopolwa shaShana Elia Irimari okwa pandula uuministeli nokomisi yomaudhano sho ya hogolola omaudhano ga dhanenwe moshitopolwa shaShana.

“Ta ti omaudhano ngoka itaga ka mwenyeka ashike aakalimo, ihe otaga ka eta wo omauwanawa galwe moshitopolwa shaShana,” ta popi ngaaka. Ta ti, aanageshefa oyendji nayo otaya imemeha sho ya uvu onkundana ndjoka, oshoka otaya etelwa oompito dhokuulika iipindi yawo.

Irimari okwa ti, oshitopolwa shaShana osha ilongekidha okutaamba ko aayenda, naayihe oyi li pomahala.

“El e lo lyondo ol op a lyOngwediva olyi li metifa okutunga okapale komaudhano okanene taka tulwa omahala gomaudhano ga yooloka, omanga elelo lyondoolopa lyOndangwa lya tameke okulonga mpoka tapu ka tungwa okapale kongushu yoomil liona dhontumba mboka tau kala hau dhanenwa monakuyiwa,” ta gwedha po ngaaka.

vkaaanda@nepc.com.na