ONDANGWA – Elelo lOndonga nouministeli womidingonoko, eefuka nomapashiyono ove ya po momhangela okuninga omaulikilo oipindi momudo tau ya taa ka kala kombinga yeenghulunghedi noihongomwa yOshiwambo.
Omaulikilo oipindi aa otaa ka ifanwa Etotha Carnival notaa ka ningilwa pOkashana komongwa kaKangonde moshitukulwa shaShikoto.
Oshivike sha dja ko elelo lOndonga ola unganeka ouvalelo wowina wa li kOndangwa wa nuninwa okuongela oshimaliwa shomalongekido omaulikilo aa. Efiku olo kouvalelo okwa ongelwa oshimaliwa shomilliona N$1.6.
Elelo lOndonga ola yandja oshimaliwa N$500 000 kouvalelo opo shi dule oku ya moshikefa shokuninga omalongekido Etotha Carnival. Komaulikilo oipindi aa otaku ka kala ovanhu tava dana oinyandwa yOshiwambo mwa kwatelwa eengano nomahokololo kombinga yovaleli va li ko nale unene tuu eehamba.
Moshipopiwa shaye minista womidingonoko Pohamba Shifeta okwa ti omaulikilo oipindi aa okwa fimana shaashi otaa ka etela oshiwana omauwa nokulundulula okukalamwenyo kovanhu tashi pitile mokuninga omangeshefelo.
Shifeta okwa ti ei oyo omhito iwa yokunana ovapashioni tava di kondje yoilonga ya yooloka.
“Oshikondo shovapashioni otashi ka yambuka po nawa molwaashi ovapashioni otava ka kala ve na ohokwe yokutalela po onhele ei,” ta ti.
Okwa weda po ta ti oshikondo shovapashioni otashi twikile nokuxuma komesho moNamibia noshoyo okuhambula po eliko shaashi natango ovapashioni onghee ngaa tava holoka momwaalu muhapu. Moshipopiwa shaye Omukwaniilwa Fillemon Shuumbwa Nangolo, okwa ti osha fimana ngeenge oshiwana tashi kaleke po efimano leenghulunghedi noshoyo oihongomwa yOshiwambo.
fhamalwa@nepc.com.na