Auleria Wakudumo
Omaulikilo oipindi yokomudo mOndobe moshitukulwa shaHangwena noneudo okwa teelelwa a ye moilonga momwedi tau ya okudja mo16 fiyo 21.
Omunashipundi wopedu momaulikilo oipindi mOndobe Nghipondoka Nghipondoka okwa ti neudo euliko lopaipindi otali ka kala koshi yoshipalanyole ‘Eyambulepo loshiwana mefimbo lelunduluko longhalo yomhepo osho yo oshikukuta, tashi pitile momangeshefelo’.
“Okupitila momashongo ngaashi aa twa taalela paife ongovanangeshefa itashi ti natu efe tu findile poshi, ndele otashi ti natu kondjife okulwa apa hatu dulu, hatu landifa oushikepengeyo vetu opo tu dule okumona mo sha,” Nghipondoka ta ti.
Kakele koipindi, Nghipondoka okwa ti pefimbo olo tuu eli, otava ka kala ve na okatanga kokeemhadi haka ifanwa “7 a-side tournament”. Vati e yi onhanda yokatanga kokeemhadi haka danwa kovanhu vaheyali kombinga.
Ohatu ka kala yoo tu na omafiyafano okakadona dingi mOndobe osho yo ovashikingalo ovo tava ka mwenyeka oshivilo ngaashi Martin Morocky, a shiivika nawa King Tee Dee.
Nghipondoka okwa holola kutya okwa li ve na eenhele 34 odula ya dja ko nokwa li she va endela nawa.
Ngaashi shi li omukalo ndjiikilile okuongela oshimaliwa shoipindi, Ondobe nayo otai ka ongela oshimaliwa sheuliko loipindi mo14 Novemba neudo, tali ningilwa monhele yomangeshefelo moSam Mweshipandeka omo yoo mwa teelelwa mu ka kale omaulikilo opaipindi muDscemba.
“Natango ohatu indile ovakwashiwana opo va kufe ombinga meuliko lopaipindi lokomudo mOndobe. Ohatu indile ovashikingalo opo ve uye va mwenyeke oshiidingili eshi osho yo keshe ou a hala okuulika oilandifomwa yaye,” Nghipondoka ta ti.