Omuprimaminista Saara Kuugongelwa-Amadhila okwa ti omauliko oipindi oo a yaamena kotema yomufyuululwakalo okwa fimana molwaashi otashi xwaxwameke efimano lomufyuululwakalo wOshiwambo, oo vali otaa lwifa ondjala noluhepo.
Onghee okwa ti omauliko oipindi otaa eta oyuuyemo noshoyo eemhito doilonga kavanyasha pefimbo tava ka landifa oilandifomwa yavo.
Kuugongelwa-Amadhila okwa ti ngeenge taku ningwa omauliko oipindi medoolopa ohashi yandje omhito koshiwana opo shi landife oilandifomwa yavo ya yooloka mwa kwatelwa oikulya yOshiwambo.
Onghee okwa indila oshiwana opo shi kale tashi yambidida omauliko oipindi shaashi otashi tu ovalandifi omukumo va twikile nokulandifa.
Edi omuprimaminista Kuugongelwa-Amadhila okwe di popya moshipopiwa shaye pefimbo kwa li ta patulula pambelewa omaulikilo oipindi opamufyuululwakalo taa ifanwa Ehao, notaa ka kala kOkahao moshitukulwa shaMusati Etivali.
Okwa weda po ta ti omauliko oipindi okwa fimana yoo vali shaashi ota nane ovanangeshefa va yooloka okudja meni nokondje yoshilongo ve uye okukufa ombinga mokulandifa.
Okwa pula omalelo eedoolopa opo a kale ta longifa oshimaliwa osho tava mono okudilila moshiwana okuyandjaneka omayakulo meedoolopa noshoyo okuyambula po eedoolopa di kale pamufika muwa.
“Onda pandula elelo lodoolopa yaKahao eshi la tula moilonga opo li kale la ninga omauliko oipindi opamufyuululwakalo neudo. Onghee oshiwana nashi longife omhito ei opo shi kale kufa ombinga yokulandifa,” ta ti.
Ovanhu 122 va dja moshitukulwa shaMusati otava kufa ombinga okulandifa oilandifomwa yavo ya yooloka koumalikilo oipindi Ehao Expo.
fhamalwa@nepc.com.na