OKAHAO – Omupresidente Nangolo Mbumba okwa ti omaulikilo oipindi naa pule komesho molwaashi otaa tungu eedoolopa nokuetela ovanhu oyuuyemo.

 Edi Mbumba okwe di popya onghela pefimbo a patulula pambelewa omaulikilo oipindi Ehao Cultural kOkahao. Neudo oshi li oshikando oshititatu elelo lodoolopa yaKahao tali ningi omaulikilo oipindi. Ovanangeshefa ve dulife 30 mwa kwatelwa outala vomahangano a yooloka ova kufa ombinga.

Oipindi oya tamekele momafiku 22 Juli notaa ka xula momafiku 27 omwedi ou.

Omupresidente okwa pula ovanyasha opo va twikile okukufa ombinga momaulikilo oipindi molwaashi tave limonemo oyuuyemo yavo.

“Omaulikilo oipindi otaa yandje omhito kovanyasha va landife oilandifomwa yavo,” Mbumba ta ti.

Mbumba okwa ti omaulikilo yopamufyuululwakalo otaa yandje ehongo kounona kombinga yefimano lomufyuululwakalo.

“Twikileni nokukala nombili momidingonoko deni. Fimanekeni omilandu da tulwa po kovaleli veni vopamifyuululwakalo,” ta ti.

Omupresidente okwa popya yoo ta ti ovanhu nave ke lishangife oukalata vomahoololo shaashi osha fimana. Okwa ti osha fimana opo omunhu keshe a longife oufemba waye a ka hoolole momwedi Novemba neudo. 

Mbumba okwa kumaida ovanafikola ve lihonge nelitulemo opo va ka ninge ovanashilonga va yooloka novaleli.

Mayola wodoolopa yaKahao Cornelia Iiyambula okwa ti omaulikilo oipindi okwa dana onghandangala yakula mokuyambula po odoolopa yavo. 

“Otwa eta mo eputuko modoolopa yetu. Oshimaliwa osho hatu mono momaulikilo oipindi ile okudilila moshiwana ngeenge tashi futu omayakulo amuni ohashi longifwa okuyambula po odoolopa,” ta ti.

 Ohamba yelelo lOvangandjela Johannes Mupiya okwa kumaida oshiwana shi kaleke po efimano lomufyuululwakalo neenghulunghedi.

Mupiya okwa ti oshiwana nashi kale nombili molwaashi Namibia oshilongo shi na oukumwe nombili.

Okwa ti omaulikilo oipindi okwa fimana molwaashi otaa lwifa ondjala noluhepo.

“Twikileni okulonga oilandifomwa yOshiwambo mwa kwatelwa oikulya shaashi otashi etele ovanhu oyuuyemo,” ta ti.

-fhamalwa@nepc.com.na