ONDANGWA – Minista weedolopa nomayambulepo okomikunda James Sankwasa okwa ti omaulikilo oipindi otaa xumifa komesho eedoolopa notaa eta omayakulo koshiwana. Edi Sankwasa okwe di popya onghela pefimbo kwa li ta patulula pambelewa omaulikilo oipindi aNdangwa.
Ovanangeshefa va kula navanini, ovaleli vopapolitika, ounona, ovanyasha novaleli vopamifyuululwakalo ova holoka momwaalu muhapu okufika kepatululo loipindi kOndangwa.
Paife ngaha oshi li oshikando oshi-12 elelo laNdangwa tali ningi omaulikilo oipindi. Ovanangeshefa ve li 280 mwa kwatelwa omahangano a yooloka otaa kufa ombinga komaulukilo oipindi aNdangwa.
Sankwasa okwa ti oipindi nai pule komesho meedoolopa da yooloka shaashi otashi kwafele okuetela odoolopa oyuuyemo. Odoolopa yaNdangwa oya xuma komesho paife. Osha fimana opo omaulikilo oipindi a twikile okuningwa,” ta ti.
Okwa yelifa ta ti omalelo eedoolopa otaa dana onghandangala yakula okuyandjaneka omayakulo koshiwana ngaashi omeva, omadu, okulonga eepate nosho yo omalusheno komalukanda nokutunga oundjuo.
“Eengeshefa oda fimana molwaashi otadi yambula po eliko loshilongo. Eengeshefa otadi lwifwa ondjala noluhepo nokuetela ovanyasha eemhito doilonga,” ta ti.
Okwa weda po ta ti osha fimana opo ovanyasha va kufe ombinga momaulikilo oipindi.
“Ovanyasha nava longife ounongo wavo okutota po oinyangadalwa oyo tai dulu oku va etela oyuuyemo,” ta ti.
Mayola wodoolopa yaNdangwa Paavo Amwele okwa ti omaulikilo oipindi otaa kwafele elelo lodoolopa yavo okumona oyuuyemo yokuyandjaneka omayakulo koshiwana. Ovanangeshefa tava kufa ombinga komaulikilo oipindi kOndangwa ova hokolola tava ti oipindi otai ende nawa okudja efiku lotete. -fhamalwa@nepc.com.na