Omukwatelikomeho gomauliko giipindi gaShikuku Parastus Nepolo okwa ti uunafalama owo onakuyiwa, sho ooshoka taya longekidha omauliko guunamapya gokomumvo ngoka tagaka kala ko okuza momasiku 24 Okotomba notaga ka hula momasiku 29 Kotomba nuumvo.
Ta ti, omauliko guunamapya nuumvo otaga ka ningwa kohi yoshipalanyolo “Okuxwaxwameka omauliko guunamapya meni oshowo kondje”.
‘’Omauliko giipindi ngaka otaga ka kala ga yooloka komakwawo agehe ga holoka oshoka ngaka otagaka kala niinyangadhalwa ya yooloka,” ta fatulula ngaaka. Nepolo ota hiya aanafalama ayehe opo ya longithe ompito ndjoka okuya okumona ontseyo ya gwedhwa po kombinga yuunafaalama. Ta ti, omauliko guunamapya ngaka otaga ka patululwa pambelewa komupeviminista guunampaya Anna Shiweda momasiku 25 Kotomba. Nepolo okwa ti kehe ngoka a hala okukutha ombinga, otaya ka pula ashike N$100 okwiishangitha.
‘’Otatu kala natango tu na omauliko giinima yOshiwambo, okuza kiikulya ayihe, iikunwa oshowo iizalomwa, ngaashi naanaa kwa li twe shi ningi omumvo gwa yi,” ta popi ngaaka.
Ta gwedha po kutya shoka oye shi ningi okukaleka po nokusimaneka wo omuthigululwakalo gwOshiwambo.
Omahala ngoka ohaga udha unene aanyasha, mboka ye na okutseya ashihe kombinga yOshiwambo opo wo ya vule okutaandelitha omuthigululwakalo koshigwana shokomongula, opo omuthigulwakalo kaagu se po.
Ta ti, oshigwana osha pumbwa okutseya kutya omuthigululwakalo ogo omulilo goshilongo nogwa pumbwa okusimanekwa opo gu kalekwe po.
“Aanafaalama otaya ka pewa wo omadheulo nkene ye na okukwatela po iikunino yawo, iimuna yawo oshowo okutseya nkene okuya po noompito dhimwe dhi ili dhuunafalama,” ta ti ngaaka.
Nepolo okwa ti, aanafaalama otaya ka longwa oshindji okupitila momadhewo, notaya ka pewa oonzapo dhawo momasiku gahugunina” ta ti ngaaka.
Ta ti, otaku ka tothwa mo mo wo aanafaalama aashona mboka taya ka mona omadheulo oshali.
Natango okwa popi kutya otaku ka gandjwa omapapa gomushingithi dhingi, ngoka ta ka hogololwa okupitila muuyogoki, mokuteleka dhingi niikwawo oyindji.
Nepolo okwa ti, otaku ka kala natango ku na iinyangadhalwa ya yooloka, oshowo omayinyanyudho.
Omushingithi gwiikulya yOshiwambo gwomOshikuku, Alma Shikongo ngoka naye taka kutha ombinga okwa ti, iinyangandhalwa yoludhi ndoka oya pumbiwa mondoolopa, oshoka ohayi hili aantu oyendji ya thike mondoolopa yawo.
“Ndjika ompito yetu twe yi nuninwa, onkene otatu ke yi longitha opo tu ka mone ontseyo ya gwedhwa po,” ta popi ngaaka.
Ta ti, omumvo gwa zi ko kakwa li a kutha ombinga oshoka okwa li e shi uvu kwa toka, ihe nuumvo ita kala po nando.
Okwa ti ngaashi sha tseyika nawa kutya egwopevi lyoshimaliwa olya guma oyendji, omawuliko giipindi otaga kwathele okweeta po oshimaliwa mondoolopa nokugandja oompito dhiilonga koyendji.
“Ngele mondoolopa omu na oompito dhiilonga oyindji, nena naakwashigwana itaya zi mo mondoolopa okukonga iilonga koondoolopa dhokokule,” ta ti ngaaka.
Ta gwedha po ta ti ngele ehumokomeho tali etwa moondoolopa, nomuthigululwakalo nago nagu xwaxwamekwe.
vkaapanda@nepc.com.na