ONGWEDIVA- Omaumbo eli lwopo 300 000 okwa dididlikwa otaa ka pewa omakwafo oikulya yoshikukuta neudo okudilila kombelewa yomupilima minista.
Edi oda popiwa kumupilima minista Saara Kuugongelwa-Amadhila pefimbo kwa li ta popi keumbo lomutumba wopashiwana Etivali oo a ti omaumbo oo taa ka pewa oshikukuta oku li 284 462.
Kuugongelwa-Amadhila okwa li ta popi nghee oshimaliwa shomutengenekwafaneko womudo 20242025 osho sha pewa ombelewa yaye tashi ka longifwa. Ombelewa yomupilima minista oya pewa mooshimaliwa shobilliona N$1.10 mmutengenekwafaneko womudo 20242025.
Omudo wadja ko ombelewa yomupilima okwa li ya pewa oshimaliwa shobilliona N$1.20 shomutengenekwafaneko womudo 20232024. Onghee oshimaliwa shomutengenekwafaneko woneudo osha shuna pedu neemilliona eeN$1546200 mokufafanifa nomudo wa djako.
Okwa ti momwaalu womaumbo taa ka pewa oikulya omwa kwatelwa omaumbo 33105 oshiwana shOvayelele noshoyo oshiwana shOvahiimba shaashi osho unene sha didilikwa tashi dengwa kondjala noluhepo. Oikulya yaavo otai ka topolwa tashi pitile mopolongalama i li koshi youministeli woukashike kookanhu onghalo nawa yokaana. Omupilima minista okwa ti ombelewa yaye oya eta po yoo oukalata vokulanda oikulya meefitola tava ka pewa ovanhu vamwepo. “Omunhu ota ka longifa ashike okakalata ndele ta pewa oikulya yaya i fike pongushu yoshimaliwa shi li kokakalata. Eefitola ashike dimwepo tadi ka longifwa odo da tula po eudaneko lokulongela kumwe nombelewa yetu,” ta ti.
Okwa ti ovanhu ve fike 2276 ova tameka nale okumona ouwa okupitila moukalata wokulanda oikulya koitukulwa ya yooloka.
Kuugongelwa-Amadhila okwa hokolola yoo vali ta ti oshimaliwa otashi longifwa pamikalo da yooloka ngaashi okuyambidida ovanhu va kumwa koiponga yombadilila ngaashi omundilo noshoyo efundja.
“Ombelewa yange otai ka yambidida yoo vali ovanafaalama va kumwa koshikukuta. Onghee ohatu kala tuna eepolongalama dokuyambidida ovanafaalama,” ta ti.
Okwa ti oshimaliwa shimwe otashi ka longifwa oikuyandjeneka omeva koshiwana tashi dengwa kenota molwashi oshi li oshinakuwanifa shombelewa yaye.
Okwa yelifa ta ti epangelo ota li lalakanene okuyambidida ovanhu ve li momhumbwe yoikulya noshoyo ovanhu dengwa koiponga ya yooloka.