Victoria Kaapanda
ONGWEDIVA-Omawuliko giipindi mOngwediva otaga ka gandja ohauto yo- 4×4 omagano komusindani omunelago esiku lyahugunina, mewiliko lyehangano lyiihauto tali ithanwa Indongo Ford.
Ohauto yo-4×4 oyi na ompito yokusindanwa kukehe ngoka ta ka kutha ombinga mokwishangitha notaya ka pewa omadhewulo gokuhinga oohauto ndhoka. Kape na oshindji tashi ka pulwa, uuthemba woshilongo ashike.
Omawuliko giipindi ngoka taga ithanwa Ongwediva Annual Trade Fair otaga ningwa oshikando oshi-20 ngoka taga ka tameka momasiku 23 sigo 31 yaAguste nuumvo.
Omukuluntu gomakwatahano mombelewa yelelo lyondoolopa mOngwediva Jackson Muma okwa ti omawuliko giipindi otaga tsikile okugandja omayakulo gongushu ngaashi shito, okukwatakanitha nokukugandja oompito dhokulonga oshimaliwa kaanangeshefa oshowo oku eta oompumbwe dha pumbiwa kaakwashigwana popepi.
“Aashingithi ye thike 451 otaya ka kutha ombinga, mwa kwatelwa ye li 25 taya zi kiilongo yokondje ngaashi Zimbambwe , Kenya , Ghana, South Africa, Botswana , Japan , Germany , USA oshowo Indonesia. Hasho oshikando shotango iilongo yomuAfrika tayi kutha ombinga momawuliko giipindi mbika, omvula ya zi ko aashingithi ye li 450 oya li ya kutha ombinga,” Muma ta fatulula ngaaka.
Muma ta ti omawuliko giipindi oge li kohi yoshipalanyolo okuhumitha komeho nokugongela oshimaliwa okupitila miinyangadhalwa ya yooloka, nelalakano okutsa omukumo aashingithi ya ete po ilandithomwa iiwanawa noyongushu.
Ta gwedha po ta ti momasiku 23 otali ka kala esiku lyokutaamba ko aashingithi ayehe yiilandithomwa yopamuthigululwakalo, mo 24 omawuliko giipindi otaga ka patululwa pambelewa kOmupresidente gwoshilongo Hage Geingob.
“Mesiku olyo tuu ndyoka otatu ka kala tu na omalugodhi gokoonyala taga ka tameka komatango, ngoka taga ka kala pokati kaNamibia naChina. Momasiku 29, otaku longekidhwa ko-MTC mewiliko lyaNestor Sunshine Boxing Academy. Esiku ndyoka otatu ka kala tu na omathigathano gohauto yo-4×4 ndjoka tayi ka sindanwa esiku lya hugunina,” Muma ta yelitha.
Muma okwa li a kumagidha aashingithi ya kale ye na iilandithomwa ya gwana lela. Omvula ya zi ko okwa li ya talelwa po kaayenda ye li 848 58.
Ta ti oya longekidha egameno lya gwana, kehe goka ta ka thika ina kala e na uumbanda wa sha nande, oshoka otaya ka kala ya dhingolokwa koosekuliti ye li 192, mboka taya ka kwathelwa kopolisi yaNamibia ndjoka tayi ka kala ya pyakudhukwa okuza esiku lyotango sigo esiku lya hugunina.