Abraham Mwanyekange

Ovakalimo momukunda Onhuno moshikandjo Onandova moshitukulwa Ohangwena otava ti kave uditile ombili mwene womukunda wavo eshi te va futifa N$2 500 okupewa omadu neenhele domalukalwa.  

“Paife edu mOnhuno olaninga ondilo nai, katu na eshiivo okutya mwene womukunda ota longifa oveta ya dja peni,” tava ti ngaho.

Josephina* (kali fi edina laye loshili), umwe womwaavo va landa eenhele ko N$2 500 okwa ti ova pumbwa ouyelele wa wana kutya oveta yedu otai ti ngahelipi lela, osheshi ova lulilwa koshimaliwa shihapu unene. 

Kundana okwa mona oumbapila vomafutilo tava ulike oukwashili weenhele dimwe odo da landwa koN$2 500.

Mwene womukunda Onhuno Benni Shinedima okwa shiivifila Kundana kutya ngeenge owa hala onhele ou na okufuta N$2 500 shaashi vati oimaliwa oyo ohai longifwa moinyangadalwa yelelo lomukunda.

“Dimbuluka kutya fye iha tu futwa, nomikunda edi otwe di futile yo ondilo, twa yandja eengobe navali ohatu pumbwa omahooli noikwafifo yomombelewa,” Shinedima ta ti ngaho. 

Shinedima okwa weda po ta ti okuwete N$600 inaa wanena aishe oyo shoo osho u wete hatu pula ongobe ngeenge kuna shimaliwa opo onhele mOnhuno. 

“Oshishako shomukunda nasho kashi na omafele ahamano, oinima oina ondilo, lombweleni epangelo li tameke okufuta oovene vomikunda,” Shinedima ta ti”. 

Shinedima okwa weda ko ta ti ovanhu pauhandimwe navo ohava landifa eenhele davo kondilo ndele kape na ou he va popi.

Omupopiliko welelo lopamufyuululwakalo lOukwanyama Andrew Naikaku okwa ti kashi li paveta okutambula ombadu yekaya ya pitilila pwaasho shi li paveta nota ti naau te shi ningi ota ka talela oveta. 

Okwa fatulula kutya elelo ihali landifa eenhele ile omadu momikunda osho yo meedoolopa nakali na oufemba wokulandifa.

Omunambelewa omukulunhu wopedu koshikondo shomadu kOhangwena Paulus Mekondjo Amaambo okwa ti keshe ou ta landifa edu na lopotwe.

“Ngeenge wa lande edu ilo to li landifa oto pewa ehandukilo u fute N$4 000 ile u uye modolongo oule wodula onghee natu likalekeni kokule naasho shihe li mondjila,” ta ti ngaho. 

Amaambo okwa indila oshiwana mOhangwena shi lopote ovo tava landifa omadu kombelewa opo va taalele oveta.

-abbenghilai@gmail