Nḓanduu Adolphus Kangootui, orata onguru yOkarukondwa kOmatoororero ka Tjinene, ngwa yarukira poruveze rwa Nguvitjita Toromba, kombunda aku kongorere orata ndji ri motjihavero nai, Ervin Katjizeu, ma suvisiwa Osondaha ndi pEtjo rOzombangaṋe ra Tjinene.
Wa ṱire omayuva tji ya ri 25 komueze mbwa zu ko, Ngarano, mOtjomuise kehi youvere ousupi nozombura 68. Okuza momatoororero wOtukondwa nOzongomainde wo-2009 otje ya kotjihavero na kara ekweze rimwe uriri okuza mo- 2010 ngandu mo-2015, ozombura ndano otjorata yOnational Unity Democratic Organisation, ousupi oNudo.
Omuhongua omukuru wo St. Barnabasa, nai ndji mai zemburuka ozombura esere. Ohamboumwe ye wa mana pu novakwao ovengi tjimuna Eben Upangura Muesee, Festus Uemumuna Ndjiruete, Uataurua Che Mavenjono, Zepee Kamunguma (omayuva ngo ngwa ri Nguaiko), Barbara Mujetenga, Edla Kaupi Kaakunga, Adonsi Betty Matheus, Hulda Herunga Kahengombe, Patjuu Tekla Rukero, Kapendaa Trifena Kahungi, Selina Humavinÿu Meroro, Kavee Kalomo, Grace Karuhumba, Selma Namalalmbo, Ishoo Mungunda, Elizabeth Vesenapi Tjiseseta, novayaruke Meisie Mazenge (Karimue?), na Evangeline Uakundja Nḓerura Tjiku¿e na Maria Mbuende Hambira.
Okuza nokumana ohamboumumwe poSt Barnabasa ovahongwa ave haṋika ozondjira auhe a twara oye tjiva ave i kozosikore yokombanda ya Kakarara, Outuiuozonḓu, Onguviki na Kombahe, nozondjira zarwe ozengi. Kangootui pa ya kOkakarara nu kombunda aka ya kOutuiuozonḓu. Mo-1976 mOsouth Afrika na Namibia amu sekama otjivepo tjokuhina kuvanga omahongero wOvazorondu nu tjinene Otjimburu. Ovahongwa ovengi aave nyengwa omahongero nga. Mu vo Kangootui ongwa rira omupyuke. Tji tje mu humisisa nokumuyengisa Moupyuke wawvo imbwi novakwao tjimuna kotjihoromende nave kamburwa ave ihamisiwa kotutu. Opa taurira okuyenda kOtjauana kehi yoSwanu nganda aka vaza koGhana. Ka kakotokera komurungu wongutukiro mena rouvere. Eye wa ṱu otjomurwe omukuru. Ndino ndi otji ma zu mOtjomuise ma wirire okuyenda koyao kOtjinoko.