I Kae Matundu-Tjiparuro
OTJOMUISE
Omuyaruke Ombara Kandjanatozombua Tjiho masuvisiwa muhuka, ndiri Orovyungura, mOkahandja mene yOmuyaruke Ombara ya Vitoto, David Kukajorua Ndisiro.
Ombara omuyaruke Tjiho watire Oritjavari ndazuko nozombura o 92. Otjiwana mouparanga wehi tjapirikire pozokomando zatjo paatjitokerwa okuza kondiro yomuhona. Erero Ombara otja kotokere mOkahandja okuza keha re kOngama kaire Oritjavari.
Eye wayakurirwe iyovimbumba nu Ombara Fanuel Tjombe akara nembo tjazumba ape kongorere otjiungura tjiomayandjero wondjozikiro kehi yombongo yOruuano.
Ombara Tjiho wayata ozondambo ozongoto momakuruhungi womuhoko okuutira kOtjawana kakwaterwa nganduu muno mo Namibia mee kutira. Movinjoko vyozondambo ze ozongoto eye mo 1957 warambwa mehi aramberwa kOtjawana iyoporise yohoromende yombangu yotjivara ya Namibia, oruveze indo ndaaritjiukwa otjo South West Africa. Oporise indji ayiungurire kehi neraa roporise yohoromende yombangu yotjivara ya South Africa.
Ozongombe ape o 5000 zao zapururwa iyoporise indji. Mo 1982 eye punotjimbumba tjovandu o 73 vakonda ondarata ndjihana o Namibia na Tjauana po Xabashe navehiti mehi nozongombe o 5000. Mo 1983 eye wapaterwa motjovakamburwa mOtjivanda oure womayuva o 15 nu tjapandurwa akakara mOngombonde mOkakarara. Tjiyari 22 ku Tjitarazu mo 1986 novandu ve otjivakahandurisiwa kOngama.
Mo 1987 wazikwa otjomutize wotjiwana tja Ngama nu mo 1992, punondangere Katjiritja Mungendje, avenana oruhindo kOtjawana ndua kazengurura omakotokero wOvaherero ko Namibia ehi rao roo ina.
Tjiyari 28 ku Kozonjanga mo 1993 wari okanepo koruhindo rOvaherero kehi yOmbara Otjitambi Kuaima Riruako ko Mohembo okukayakura otjimbumba otjitenga tjOvaherero okukotoka kehi rao.
Tjiyari 22 ku Ndengani mo 1993 wari okanepo koruhindo rwarwe kehi yOmbara Otjitambi Riruako okukayakura otjimbumba otjitjavari okukotoka po Mohembo. Tjiyari 29 ku Tengarindi mo 1994 rukwao wari puna Ombara Otjitambi okukayakura ovinamwinyo okuza kOtjawana po Dobe.
Ombura tjingeyo watuirisiwa otjomuhona wOvaherero va Ngama. Eye watire motjihavero iho. Tjiyari 16 ku Katjose mo 1996 otjivakayakura otjimbumba otjiseinina okukotoka puna ovinamwinyo vyatjo.
Ombara Tjiho wakwatwa tjiyari 3 ku Rozondu mo 1916 po Ndauha mo Mau mo Tjauana. Wakupa Zaendua Kuhanga nu kombunda mo 1988 Kanjamu Kamutati. Wari novanatje vetatu, omuzandu umwe novakazona vevari.
Motjauana wari okanepo koruhindo rOvaherero kehi yOmbara Kazoninga Kahaka, nongundue Hijazombambi Kamutati, nduapirura eraa rOmbara Otjitambi ya Tjauana, Moremi, rokuramba Ovaherero momahi womaryo okuverambera kourongo rongo.