Ombaye Fishing Company onghee tai twikile nokuyambidida oshiwana unene tuu ovanhu ava ve li moluhepo.
Etitano loshivike sha dja ko Ombaye Fishing Company oya yandja oikulya keenhauki daAngola edi di li komukunda Onghalulu u li moshikandjohoololo shaKongo, moshitukulwa shaHangwena.
Meenghundafana a ninga naKundana omunashipundi wOmbaye Fishing Company Libolly Haufiku okwa hokolola ta ti Ombaye Fishing Company otai lalakanene okukwafa ovanhu ava ve li momhumbwe yoikulya nosho tuu.
“Otu na oshiwana komutima, onghee ohatu ka yambidida ovanhu aveshe ava ve li moluhepo moitukulwa aihe moshilongo.
Otwa lalakanena yoo vali nokukwafela ounona voukwanaluhepo neefiye aveshe ve li moluhepo,” Haufiku ta ti. Eenhauki edi oda pewa oikulya ngaashi oukutu voufila, omaadi okutula koshivelelwa, oshivelelwa noikwafifo ikwao ya wedwa po.
Moshikandjohoololo shaKongo omwa lopotwa mwa mbobolokele eenhauki daAngola neudo, edi di li da ngudumana momukunda Onghalulu.
Eenhauki edi oda kala nokumona omakwafo oikulya, oikumbafa noikutu taa di moshiwana.
Kansela woshikandjohoololo shaKongo Efraim Shipindo okwa tambula ko oikulya ei nolupandu linene. “Onda pandula unene Ombaye Fishing Company eshi ya kufa etokola lomondjila opo i yambidide oshiwana shaAngola eshi shi li sha nguduma apa tashi mono oixuna,” Shipindo ta ti.
Eshi oshi li oshikando oshitivali Ombaye Fishing Company tai yambidida moshitukulwa shaHangwena. Neudo vali Ombaye Fishing Company okwa li ya tungila ovanhu vovayelele omaumbo e li 10 komukunda Onakalunga moshikandjohoololo shaMundaungilo.
Shipindo okwa ti oshiwana nashi kwatafane nombelewa yaye uuna ngeenge sha hala okuyambidida oshiwana moshikandjohoololo shaye.