Jazema Hangero
Ombazu neraka rOvaherero ponganda yomahongero wokombanda indji Ounama ye nyomoka nawa mena rokuṱiziwa i yotjimbumba tjombazu ponganda ndjo.
Motjiṱo tjokuṱiza, okupwika okuhonga nokukurisa ombazu indji. Otjimbumba tjombazu ihi mo 2023 tja taara ondjambi nombura ndja zuko tjeyere poruveze orutenga povitjitwa vyombazu mbi sembamisiwa i yOunama.
Omuhungirirepo nomupitise wozombuze nomutjiukise wovitjitwa vyotjimbumba tji, Jaongo Kamuṱati, ma tja u nohange nekuruhungi nomaunguriro wotjimbumba nu ma zeri kokutja Otjiuaṋa Cultural Society tji kawondje komurungu okuhongorerapo ovimbumba vyarwe pOunama. “Ami tjiri mbi nonyuṋe nomitanda vyOvaherero mbya zikama nu mbi kondja okukongorera ombazu yavyo popezu kokutja ai ha pandjara.
Mouye mwe ya omarundurukiro omengi tjinene nu ovandu ve yenena okuhwangwa nokuumwa i yomihoko nozombazu zovandu varwe. Tjiri otjiṋa otjitonenwa’make kokutja ovandu voyandambi ya Hengua va panḓera povyawo, ombi ve nyomokisa nokukongorera,” Kamuṱati ma tja.
Na raisa omunyandatima notjivarerero tjovahongwa vombura indji mbe rikwambere kotjimbumba nu mbu mave raisa ombango nonḓero yokukawondja komurungu okukurisa Otjiuaṋa.
Kuuherikupi Katuuo, omuhongwa wombura ondenga, ma tja Otjiuaṋa we tji zuva rukuru ngunda aeri mozondondo zokehi nu aa zeri kokutja tja kamunika a vaza pOunama me kerikwamba kOtjiuaṋa Cultural Society. “Ami mbi nohange kutja Otjomuherero mbe rikutu kotjimbumba tjovandu veraka retu, mu novimbumba pekepeke pOunama posi ya mba nakaura (hahiza) kavi nokundjipuka, orondu mbi sokurira orupa rwaimbi ovyetu, e yandja komasa nohambwarakaṋa kokutja avi ha zembwa nokukoka.”
Ondando nonḓero yOtjiuaṋa Cultural Society okukondja okuvaza kovahongwa mbe ri mozosikore okukevepa omasa nokukatjiukisa omihunga mbi rihongwa pOunama, wina tji kondja okuvaza kovirongo notukondwa ku ku hupira ovandu veraka ndi tjimuna Omaheke, Otjozondjupa na Kunene nokukavanḓiparisa ovahongwa kokutja ve yere ovikausina orondu otukondwa tu tu ungura oungundi tjinene momarorero wohambondatu nomurongo.
Ouzeu mbu ri po ouhepe wovimariva tjazumba ombura osupi orondu otjovahongwa ve kara nomerizirira noviungura ovingi tjinene. Kamuṱati wa pata ama ningire oruvara nozombatero okuza kotjiwaṋa kokutja ve yenenise ozonḓero nozondando zOtjiuaṋa Cultural Society.