ONGWEDIVA – Ombelela yoshingulu oyo imwe yomomaludi eembelela hadi liwa mounyuni aushe.
Oshingulu ohashi li oikulya aishe –oimeno noikwambelela, nomolwa oukwatya washo ou, osho oshinamwenyo shipu oku tekula nombelela yasho ya sha oku monika kovanhu vahapu.
Ashike nande ongaho, ombelela yasho oya nyika oshiponga, notai dulu oku eta omikifi odo nokuli tadi dulu okudipaa omunhu, ngeenge oya liwa inai pya nawa.
Omundohotola woinamwenyo, koshikondo shokuungaunga nomikifi doinamwenyo mOndangwa, Nelson Andimba, okwa ti ombelela yoshingulu otai dulu oku etela omunhu omapuka medimo.
“Oshingulu ngeenge osha li omai eembakiteli odo hadi kala unene momeva, ombakiteli oyo ohai ka ninga oitumba oyo hai kaya meenhumba doshingulu. Ngeenge nee omunhu okwa li ombelela oyo ndele inai pya nawa omai oo ohaa ka tenduka ndele taa ningi omapuka medimo lomunhu,” Andimba ta ti.
Andimba ta ti, oingulu ovatuvikili vawa vomai eembakiteli, nongeenge omunhu okwa li ombelela oyo i na oshitumba shomai, omai oo ohaa ka tendukila medimo lomunhu ndele taa ningi omapuka.
“Ngeenge ombelela yoshingulu oi yadi unene omai, omunhu oto mono oitumba ihapu ihapu mombelela oyo hai ifanwa omahola. Omai oo ngeenge okwa tendukile medimo lomunhu ndele omapuka taa kulile mo ohaa tameke nee oku dalafana, taa hapupala,” Andimba ta fatulula.
“Omadidiliko ngee omunhu e na omapuka medimo okwa kwatela mo ekanifo leenghono, shaashi omapuka oo ohaa kala taa hakana po oitungifi oyo omunhu ta li. Omunhu oha kala a loloka efimbo keshe shaashi keshe osho ta li oteshi tukula nomapuka. Oho kala yoo to mbilingwa ove ku wete ko nawa shaashi imapuka aa ohaa yi yoo omunhu kouluvi,” ndohotola ta fatulula.
Andimba okwa fatulula yoo kombinga youpyakadi hau etwa kokulya ombelela yoludi keshe inai pya, ta ti oshinima tashi dulu oku tandavelifa omikifi.
“Ombelela inai pya ohai kala ya humbata eembakiteli, yoo vali otai dulu oku eta ediyopalo loikulya olo la nyika oshiponga komunhu. Oinima ngaashi eefungi ohai dulu oku mena kombelela ngeenge inai pungulwa nawa. Oto hange omunhu ta kufa okapambu kombelela mokila taka ndjenekwa mbali luvali ye teka shuna mo. Elunduluko loupyu lihapu efimbo nefimbo otali dulu oku etela oshikulya shi kale shi na oupyu muwa keembambakiteli,” Andimba ta ti.
Amen Ames ota dimbuluka efiku a uda oshinima tashi li nyenge pokati komaulu aye, efiku limwe manga a li ta tale oTV. Eshi a ya mokandjuo okwa dimbulula kutya oku na epuka lile lile la fa oukoloni vospageti mokadolombuluku.
“Onda haluka neenghono. Ashike manga inandi mona epuka olo, onda ningile omafiku ndihe udite nawa. Efiku la landula onda ya koshipangelo, handi ulikile ndohotola efano lepuka olo nda hanga mokadolombuluku. Epulo lotete a pula nge, okutya ngeengee onda ninga omafiku handi li ombelela yoshingulu. Okwa lombwela nge kutya okayoka oko, epuka lomedimo, hali ya ngee wa li ombelela yoshingulu inai pya nawa,” Ames ta ti.
Ta ti manga ina mona epuka olo, ina kala naanaa e na ehalo loku ya koshipangelo, nande a kala nomadidiliko ngaashi naanaa a fatululwa komundohotola Andimba.
“Okwali nda tila kutya ohandi fi. Omapuka oo vati ohaa dulu oku kula male male ndele taa kala taa li ouluvi ile exuli loye. Paife ohandi li vangeke oku lya ombelela yoshingulu, shapo ongeenge ndei teleka ame mwene,” Ames ta ti.
Shituna… ombelela yoshingulu otai dulu oku ku etala oupyakadi ngeenge owe i li inai pya nawa.
Efano: otwe li pewa