I Kae Matundu-Tjiparuro
OTJOMUISE
Ombepo ndja hitisiwa iyotjira tjo komamuho o Links mOndjuwo yOzoveta yehi rOvandoitji ndjareserwe otjikando otjitenga Oritjatu mondjuwo indji, maitanda ouyenda oure wokutua otjiposa tjOtjitiro Otjindjandja notjisuta kotjihungiriro mopolotika yOvandoitji.
Ombara Otjitambi yOvaherero, Kuaima Riruako, watjere nao pombongarero yozombuze motjihuro ohongora tjOvandoitji, o Berlina, Oritjatatu komurungu womaresero omatenga wombepo indji.
Riruako waningirire ovira avihe mondjuwo indji mbikambura mouyara okutjinda otjina ihi no kuhina enyando nu nowiingona.
Watjere ongondjero yovandu ve okumuna otjisuta onawatjiri nu owatjiri koruseinina ombutaara ongutukiro ya Namibia na wina yovavatumisiwe ovengi kouye otja tjiyaraisa.
Watjere ombepo indji kayo kupatura ovito nungwari maipura epuriro rimwe epupu uriri. “Ongwaye ohoromende yOvandoitji tjii havanga okuhungira kuna ovandu va Namibia mbuya zunda?”
Watjere indi eepuriro ndimavanga ozonganda zozombuze nu okutuurungira muzo otjiwana atjihe tjOvandoitji okumuvatera kutja ohoromende yOvandoitji izire.
Omukuramenepo wohoromende ya Namibia mehi rOvandoitji, Onongo Peter Katjivivi, potjitjitua trjingetjo watjere ohoromende ya Namibia ina ombango onene mombepo indji. Watjere oukahuke kutja omaresero omatenga wombepo indji otjina otjinahepero tjinene ko Namibia nohoromende ya Namibia otji maiyakura kutja otjina ihi matjinhungirwa mondimwa youyara wehi rOvandoitji, ndjiri ondjuwo yozoveta yehi indi.
“Posyo mena rounahepero wotjina ihi atjarira ombwiro nandaku ombepo indji yaetua komurungu yo Bundestag iyovira avihe.” Watjere mo Namibia ombepo tjingeyo yayakurwa iyovira avihe mena rokutja otjina ihi tjituna ku avehe nu kako viwana mbya ihamwa uriri.
Katjavivi watjere otjiungura tjohoromende ya Namibia okuvatera kangamwa ongondjero yondjesirasaneno noupore kutja rutenga opokati kovature va Namibia oveni namo tjiwana tjao poo opokati ka Namibia novazapamwe motjina ihi mberi ehi rOvandoitji.
Riruako maundjirua okukotoka mehi Osondaha nu momurongo nambari makara nombongarero yozombuze po komando mOtjomuise.