OTJOMUISE– Otupa otuingi tua Namibia matuso okuundjira ko ombura ndjimairoko otja tjiiroka ohapo nganduu kombanda ya nao okuza mu Seninani nganduu mu Tjitarazu ombura indji, otja kEhika rOmaukiro wOmbepo rOrukondua rua Africa kOmanene momaukiro waro omaseinina.
Mu Tjitarazu nganduu mu Tengarindi mo 2014, ape ozondendera azehe za Namibia mazeundjirua okumuna ombura ndjiri kombanda yaindji ndjiroka ohapo. Omaukiro inga mo Namibia oyo ngeri omayakurua yayandjerue indu ovatjiwe vombepo meyuru tjivahaamene Oritjaine ndazuko motjihuro ohongora tja Zimbabwe, o Harare, pombongarero oitja 17. Ombongarero ndjahaamene omayuva yevari indji yahaamene okutara momaukiro womarokero wombura mekueze romarokero mo 2013/2014 ndimariutu omueze mbumauyende.
Ombuze ombua okoo kutja orukondua ruo SADC maruso okuundjira ko ombura otja tjiiroka ohapo no kombanda yanao okuutira momueze mbumauyende. Posi Ehika indi rawezere ko kutja otupa ondjendjeto nomuronga koutokero wa Namibia, o Angola komanene okupikira koutokero, ozondjendjeto nomuronga kongurova ya South Africa na kongurova yo Democratic Repupblic of Congo (DRC) mamuundjirua ko ombura otja tjiiroka ohapo poo kehi ya nao.
Mu Tjikukutu na Tjitarazu ombura indji, nawina Rozondu mo 2014, orupa orunene ruo SADC maruundjirua okumuna ombura otja tjiiroka nganduu kombanda ya nao ngunda orupa orunene ruo DRC, koutokero nokomamuho okupikira koutokero wa Angola nawina ozohiriro zoutokero wa Namibia na South Africa amapeya azemunu ombura otja tjiiroka poo kehi ya nao.