Auleria Wakudumo
Nonande ovakalimo vamwe konooli ve na omeva a pata eefikola neendjila eshi odula ya ninga omafiku tai loko nawa, vamwe otava pandula eshi va etelwa oshivelelwa nokumona mo okafilinga mokulandifa.
Ovalumenhu vavali va hangika tava kwata eeshi momukunda Emono popepi noShakati moshitukulwa shaShana ova ti ova hafa eshi odula ye ya oku va kufa omukaa noluhepo.
Shuuveni Mateus okwa holola ta ti okwa ninga etokolo okuninga ouluwa nokukwata eeshi efiku keshe opo e limonene ofilinga yoku mu kwafela.
“Okukwata eeshi okudule okukala meumbo uhe na eshi to ningi ove ito mono oyuuyemo yasha. Ngaashi omukulu wonale a tile, omutumba efete,” Mateus ta ti.
Mukwao, Simon Shithigona weedula 21 okwa ti ohava mono ovalandi vahapu mwa kwatelwa ovakwashiwana vaChina.
“Eeshi defudja ihadi kala po ngaashi mwa hanga da pwa po nale nokuli. Kakele keeshi defundja, ohatu landifa yo eenhangu nomakende,” ta ti.
“Ohandi kwafele okutwaalela oshivelelwa keumbo oshoyo okulanda oipumbiwa yange. Nonande inandi shi pondola mofikola, oilonga yokomake ondi i shi nawa shamha ashike tai etele nge omboloto,” Shitigona ta ti.
Shithigona okwa twa ovanyasha unene ava ve li momaumbo opo ve likongele omboloto yavo pefimbo eli lodula mokukwata eeshi nokulandifa.
Nonande efundja inali ya natango, ovakwashiwana keembinga neembinga otava kwata eeshi.
Ovakalimo vamwe vomomukunda Ongobe Yomunghudi moshitopolwa shaHangwena navo ova hovela nale okukwata eeshi meendobe nomomadiva.
Ova holola kutya nonande oushi inava kola natango nawa, ohava kwata va ka velele.
Ohatu tula mo ounete momeva ndele hatu aluka komatango tu tale ngeenge otwa kwata mo sha. Eeshi inadi kula nawa natango okukwatwa neendjolo. Nande di kale dishona, ode tu kufa ashike omukaa.