OKAKU- Omupedupresidente Netumbo Nandi-Ndaitwah okwa ti osha fimana ngeenge oshiwana shina omeva molwashi omeva okwa fimana.
“Epengelo ota li twikile okukandula po onghalo yomhumbwe yomeva,” ta ti.
Edi Nandi-Ndaitwah okwe di popya pefimbo kwa li patulula pambelewa omatale 11 omeva komukunda Onyeka moshitukulwa shaShana oshivike sha djako.
Mopaife ngaha keshe shikandjohoololo shi li moshitukulwa shaShana oya felwa etale lomeva. Moshitukulwa shaShana omu na oikandjohoololo 11. Omatale okwa fewa kongushu yoshimaliwa eemilliona N$14.2.
Nandi-Ndaitwah okwa ti oshi li oshinakuwanifa shepangelo okuyandjaneka omeva koshiwana. Okwa ti omatale oo ota ka etela ovanhu omauwa noshoyo oimuna yavo.
“Omatale okwa fimana koimuna. Oimuna yeni itai ke enda vali eendjila diledile ya uka komatale okokule,” ta ti.
Okwa ti ovanhu nava longife omatale okuninga oikunino younamapya.
“Oshikondo shounamapya osha fimana moshilongo molwashi otashi lwifa ondjala noluhepo noshoyo okuyambula po eliko,”
Okwa kumaida ovadali opo va yandje ehongo kounona vavo vaha danene omeva.
“Ounona ina va danena momatale shaashi osha nyika oshiponga,” Nandhi-Ndaitwa ta ti.
Nandhi-Ndaitwa okwa ti omudo wa djako okwa li a talela po oshikandjohoololo shaKaku nokwa li a ninga eudeko kutya keshe oshikandjohoololo otashi ka pewa etale.
“Ama ihandi popi oipupulu. Ondina oshisho noshiwana shaNamibia,” ta ti.
Nandhi-Ndaitwah okwa popya ta ti natango moshitukulwa shaShana ota mu ka tungwa omatale omeva noshoyo omayakulo amwepo. Okwa kumaida oshiwana opo shi ka hoolole ongudu yoSwapo neudo momafiku 27 Novomba.
“Inde ni momwaalu muhapu okukahoolola Swapo shaashi Swapo oye ashike ongudu tai dulu etela ovanhu
omayakulo popepi,” ta ti.
Okwa lombwela oshiwana opo shi kala shina ombili noukumwe momidingonoko davo. Ovakwashiwana ova ti ova pandula eshi epangelo ta li yandjaneke omayakulo koshiwana unene tuu okandula po omhumbwe yomeva.
Ova popya tava ti oimuna yavo itai ka dengwa vali kenota molwashi paife ova pewa omatele omeva e li popepi.
– fhamalwa@nepc.com.na