Ehangano lyoNamWater olya londondha oshigwana miitopolwa yokonooli, Oshana, Ohangwena nOshikoto opo ya kale ya teka omeya oshoka otaga kala taga pata kehesiku okuza potundi 22h00 sigo 04h00.

Omugandji gwomauyelele omukuluntu koNamWater Lot Ndamanonhamata okwa ti, epato lyomeya olya tameke oshiwike sha ziko tali yi sigo omasiku 31 gaMei nuumvo.

“Omeya otaga kala taga pata omasiku agehe ngoka oshoka otaga longwa. Shika osha etwa komeya gomvula okuza miishana ngoka gayi mumwe nomeya gomokanala,” ta fatulula ngaaka.

Ta ti, omeya ngoka taga zi miishana otaga gandja uupyakandhi kondama onene yomeya yOshakati, ndyoka hayi andjaneke omeya kiitopolwa iikwawo yokonooli.

Ndamanohmata okwa ti, omeya otaga piti nuudhigu omolwa omeya ngoka ogendji taga yi mo. “Opo tu yande omeya ga pate thiluthilu otweya po nomukalo goku ga pata ethimbo aantu oyendji itaaga longitha, naamboka ha yega longitha naya kale yateka omeya,” ta popi ngaaka.

Ta ti, NamWater okwa ningi esiku ta longo ominino dha topa miitopolwa ya yooloka, odhindji odhaadhika kohi yomeya.

Ndamanohmata okwa indile wo oshigwana shi kale tashi lopota komalelo goondoolopa oshowo koombelewa dhili popepi uuna ya mono ominino dha topa dhi longwe mbala.

Natango elelo lyondoolopa yaShakati olya kumagidha aakalimo yawo opo ya kale taya lopota ominino dhatopa mondoolopa.

Omunambelewa omukuluntu gwokugandja omauyelele Katarina Kamari okwa indile oshigwana kutya, kehe ngoka taka tsakaneka ominino dha topa nalopotele oombelewa dhawo.

“Uuna ominino dha topa odha pumbwa okulopotwa opo dhi longwe meendelelo,” ta kumagidha ngaaka. Ta ti, ominino odha pumbwa okulopotwa uuna dha yonuka, opo kaa ga hepe. – vkaapanda@nepc.com.na