OUTAPI – Oshitukulwa shaMusati nonande shi na edu liwa nomeva taa dulu okulongifwa mounamapya, oshi na ashike oiputudilo yopombada ivali oyo hai longo ounamapya.
Omusati ou na oiputudilo youngoba iheyali, naashi shopombada shimwe, ashike oUnam, no-DAPP Vocational Training School oyo ashike hai longo nounamapya.
Omukulunhufikola wo-DAPP Lysius Paulus, okwa ti ofikola yavo oyo ashike hai longo nounamapya, ashike okuudite kutya ngeno oshitopolwa oshi na okukala ombaanga yoikulya, molwoushosho oshoyo omeva aa e li mo kuhe na vali. “Natu xulifei po omukalo wokukala ashike twa hala okuninga omaifano opaungoba omanga hatu fiyei po eemhito dounamapya edi tadi tu pe oilonga efimbo keshe. Ovanhu otava fi ondjala, fyee vali otwa pumbwa okulonga noudiinini opo tu dule okutwa ava hava kala va hala okuyandja omakwafo omukumo opo va dule oku tu vatela apa naapenya,” Paulus ta ti.
Okwa twikila kutya DAPP oha yandje eekoosa da fika punhee, ashike ounanamapya oo hau kala wotete mokuyada ovakufimbinga. Okwa ti ofikola ohai mono omauwa ahapu mounamapya, unene tuu ngeenge tashi ya pokulandifa oingumutulu ei hava longo voo vene. Vati oimaliwa ei hai di mo, ofikola ohai mono ko eepelesenda 30, omanga ovanafikola hava pewa eepelesenda 70 opo va dule okulikwafa eemhumbwe davo manga ve li mofikola. Okwa twikila yoo kutya, natango ohava taalele omashongo, ngaashi ounona ava va dja komaushai vehe shi okulongifa omashina ahapu opashinanena e li mofikola, nohashi va pula v li va kufe ovanhu tava futwa opo ve va deule. Okwa ti natango ove na yoo omhumbwe yakula yonhele apa va hala okuninga oikunino imwe yakula, shaashi omwaalu wovanafikola ohau ende tau kulu keshe odula. Martini Shuudeni, omupresidente wovanafikola vakwao mofikola, okwa tumbula kutya vahapu vomuvo eshi she va undulila mounanamapya, ova mona nghee mu na eemhito dihapu domauwa inadi ngabekwa.
Okwa twikila kutya ounamapya ohau pumbwa ovanyasha ngaashi voo, woo vali kaudjuu, okuyelekanifa neekoosa dikwao shaashi oshinima have shi ningi okudja komaumbo, nova pumbwa ashike ounongo wa nenepekwa musho. “Nonade mofikola tu li mo hatu denge ounamapya, natango otu li mo tu na omhumbwe yoilongifo yongushu tu dule okulonga oinima ihapu poshikando shimwe,” ta tumbula.
Okwa twikila kutya ova pumbwa yoo eemateliala dokuliamena ngeenge tava longo, shaashi ohava kala ve li popepi nokulilemaneka. Shuudeni okwa tumbula kutya nonande ve na omashongo taa valulwa, okwa hala okutwa omukumo ovanyasha vakwao ve li momaumbo, va tameke ounamapya shaashi osho oshinima shi na ombilixa koinima aishe, shoo vali vati oshi na eemhito doilonga dihapu noda yooloka. Okwa ti okwa hala yoo epangeleo li va dimbuluke moinima ihapu, unene tuu ngeenge va mane ofikola, va pewe nande eenhele dokuninga oikunino. Vati efimbo limwe ounona ohava kala ve yadi ounongo, ashike kave na apa tave u longifa, molweenhele dihe po.