Auleria Wakudumo
Ngoloneya woshitukulwa shaShana, Elia Irimali okwa indila eefikola opo diha landife vali omidjalo dofikola dondilo.
Irimali eshi okweshi popya peyandjo lomapapa ovahongwa novahongi ovo veshi endifa nawa omudo waya Etitano posekundefikola yaKatana moshitukulwa shaShana.
“Otu shishi kutya ovakulunhu vahapu itava dulu okulanda omindjalo dofikola odo dina odilo. Oshimaliwa natango otashi kande omapunya movakwashiwana, onghene inashi pumbiwa oku eta po omudjalo una ondilo,” Irimali ta ti.
Irimali okwa ti okwa didilika eefikola dimwe dina natango omidjalo odo ovadali tava dulu okulanda ashike dimwe otadi uya po nomidjalo dina ondilo unene.
Irimali okwa holola yo kutya epangelo onghene tali twikile nokuwanifa po omaudaneko oo la nigila ovakwashiwana.
Okwa ti epangelo otali ka patulula ofikola onhivali yokompiuta tai ka tungwa mOndangwa.
Oshitukulwa shaShana oshi na nale ofikola yokompiuta mOshakati oyo yali ya tungwa nongushu yoshimaliwa shi fike pomiliona N$1,6 ya yandjwa koRani Trading.
Ofikola ei oyali ya tungwa mo2022 noina eengulu dokulongela dili nhee naimwe yokupungulila.
Ngoloneya okwa indila ovakwashiwana unene ovanangeshefa opo va tulwe oukuni kumwe nepangelo okukwashilipaleka kutya edilaadilo lofikola yokompiuta onhivali ola lalakanenwa mOshana.
“Otwa pumbwa okutunga eefikola odo tadi lalakanene okuhanga eemhumbwe dovanafikola vetu mounyuni wopaife,” irimali ta ti.
Irimali okwa weda po kutya ehongo ola fimana nounona nola pumbwa okutulwa pokati komuhongi oshoyo omudali.