Uuministeli wuuhaku nonkalo nawa owa ti, omiti dhoAstraZeneca dhili 75 000 odha thiki moshilongo, nodha thika poosenda adhihe nena.
Minista guuhaku nonkalo nawa Kalumbi Shangula okwa ti, omiti odha andjanekwa poosenda adhihe tadhi tuntile, nethimbo ndika otaya ka tuntila unene mboka taya pula olweetho olutiyali.
“Ota tu kumagidha kehe gumwe ngoka ali inaamona ompito yoku tuntilwa, omolwa omiti dha pwapo, eye hatuntilwe okuza nena,” taku magidha ngaaka.
Tagwedha po ta ti, oya indjipaleka omahala goku tuntilwa, okwiindika omikweyo omileeleka oshowo omangundumano.
“Omiti dhoka okwali twedhi pewa kepangelo lyaDutch “The Netherlands”, no dhali dha thiki Olyomakaya,” ta popi ngaaka.
Uuministeli owa dhidhilike iipotha ya shuna lela pevi, ihe sigo oompaka iipotha oyindji otayi lopotwa okuza kiitopolwa yoko nooli.
“Ota tu kumagidha oshigwana shi tsikile mokwiitulamo moku tuntilwa oshowo moku andjaneka uuyelele kombinga yesimano lyoku tintilwa,” Kalumbi ta ti ngaaka.
Kalumbi ta ti, oyena omukumo kutya etuntilo ota li kwathele lela moompito odhindji nonando haadhihe, oku shonopaleka ompito yoku kwatwa komukithi gwoCovid-19.
“Aalongwa mesiloshimpwiyu lyaalongi, naya itule mo moku gwanitha po noku landula omalombwelo agehe, oku yanda epato lyoosikola omolwa omukithi ngoka,” ta popi ngaaka.
Ta ti, omukithi nguka otagu vulu oku sindika uuna kehe shoka tashi lwithwa nasho, tashi gwanithwa po, noku landulwa.