Ovakainhu have lilandifile puKandjengedi ova fiwa pomutenya konima eshi opolifi yaShana ya teta po omiti noixwa opo kwa li hava ningile ongeshefa yoixulo.
Omupopiliko wopolifi moshitukulwa shaShana Inspector Thomas Aiyambo okwa koleka ta ti opolifi, elelo lodoolopa yaShakati noshoyo ovakwashiwana ova teta po omiti di li ponhele opo kwa li hapa ningilwa oilonga yoipindi kovakainhu ngeenge tave lilandifa po.
Onghee omukainhu umwe okwa ti ongeshefa yavo paife oya iwa moshipala molwaashi itava ka longifa vali okuya moixulo koshi yomiti.
Aiyambo okwa ti ponhele opo opa wapalekwa oshivike sha dja ko nelalakno okukelela ovanhu vaha ningile vali oixulo koshi yomiti ngeenge tave lilandifa.
“Itashi ulike efano liwa ngeenge omunhu ta ningile oixulo koshi yomuti. Onghee naashi osha eta opo tu kale twa wapaleka ponhele opo,” ta ti.
Okwa didilikwa ovakainhu vehe na oilonga mOshakati va tota po ongudu yavo yokulilandifa tashi pitile mokuya moixulo novalumenhu omo hava kala tava futwa oshimaliwa.
Ovakainhu vovanyasha ohava kala va ngudumana pomukunghulo wopate molukanda Okandjengedi tava kongo ovalumenhu opo va ye navo moixulo tava pingakanifa noshimaliwa.
Onghee ponhele opo ohapa kala ovakainhu va djala eebwila, nomilungu da paindwa tava kongo ouxupilo.
Aiyambo okwa weda po ta ti elalakano lokuwapaleka ponhele opo okukelela yoo vali oumbudi wovalumenhu hava ka hondama moixwa konima ngeenge ova nyeke ko omaliko ovanhu.
Okwa kumaida ovakainhu opo va xulife po okuningila oixulo koshi yomiti molwaashi itashi ulike efimano moshiwana.