Festus Hamalwa
Minista youhaku nonghalonawa Dr Kalumbi Shangula okwa ti omivalu dovanhu tava kwatwa kombuto yoCovid-19 owa shuna pedu konima yomafiku anhe a pita moshivike eshi.Shangula okwa ti ouministeli wouhaku owa didilika yoo vali nomwaalu wovanhu tava fi kombuto yoCovid-19 wa shuna pedu oshivike eshi okufaafanifa noivike ya pita.
Okwa ti eshi otashi ulike oidjemo iwa eshi nomwaalu wovanhu tava veluka omukifi woCovid-19 owa ninga muhapu.
Edi Shangula okwe di popya Etivali eshi a ninga eenghundafana naKundana, a hokolola ta ti Omaandaxa moshilongo inamu lopotwa omunhu a fya kombuto yoCovid-19 ashike Etivali omwa lopotwa ovanhu vavali va fya kombuto.
Okwa hokolola ta ti ouministeli otau twikile nokulonga noudiinini okukondjifa ombuto nokukwashipaleka kutya etandavelo lombuto ola shuna pedu.
Shangula okwa ti ovanhu ava tava kwatwa kombuto vahapu inava tunhilwa unene tuu ovanhu ve li ko-ICU moipangelo.
Onghee minista okwa kunghilila oshiwana opo shi twikile noku ka tunhilwa shaashi osha fimana ngeenge omunhu a tunhilwa.
“Ngeenge omunhu a tunhilwa oha kala e na omhito ishona yokukwatwa koCovid-19 omanga ovanhu ava inava tunhilwa ohava kala ve na omhito yakula yokukala va kwatwa kombuto,” Shangula ta ti.
Okwa ti komandiki ayeshe ouhaku oku na omiti da wana okutunhila ovanhu onghee oshiwana nashi talele po omandiki ouhaku aa e li popepi navo opo va ka tunhilwe.
“Ombuto yoCovid-19 otai shuna ashike pedu ngeenge oshiwana tashi liufa komilandu edi da tulwa po okukelela ombuto onghee oshi fimana ngeenge ovanhu tava veli ufa komilandu doCovid-19 efimbo keshe,” Shangula ta ti.
– fhamalwa@nepc.com.na