Opolisi yaNamibia oya yelayela oomeme nootate yeli miikutu ye li 2,990 ya tameke okuza momasiku gotango gaNovomba nuumvo.
Ndhoka odha thamunwa kukakukutu komataga moshilogo Joseph Shikongo, ta ti ye li 1 342 aakiintu omanga ye li 1 648 aalumentu.
“Esiku lyonena olya simana lyo olyi shi okusimanekwa koyendji yomune sho mwa mono oompito dheni dhoonkatu dha landula ko, naashoka omwe shi ningilwa omolwiilonga neyitulemo lyeni okukwashilipaleka kutya ayihe oyi li melandulathano ngaashi sha tulwa po okugamena nokukeela shoka shaa li mondjila,” ta popi ngaaka.
Ta ti, ohashi pula eitulemo nuuyuuki wa kola opo omupolisi a gwanithe po iilonga ye yi li ngaashi yi na okulongwa onkene oshi shi okupandulwa momukalo ngaashi nguka tagu ningwa ngeyika.
Ta kumagidha kutya aapolisi ayehe mboka ya yelwa okwa tegelelwa ya tsikile nokulonga neitulemo, okukala lela ye na omikalo, taya longo pambelewa okuhwepopeka egandjo lyomayakulo osho wo okulonga iilonga yawo pondondo yopombanda ngaashi taya vulu.
“Kapu na omupolisi e na okulombwela omukwashigwana ta pula ekwatho kutya kapu na iihauto yokuya kuyi ishewe opolisi nayi yamukule mbala taya longitha oonzo ndhoka dhi li po opo ya kwathele oshigwana, peha lyokugandja omaipopilo,” ta popi ngaaka.
Omumvo gwa ziko ethimbo olyo tuu ndika aapolisi ye li 1 930 oya yelwaayelwa okuza ponkatu yuukonstable okuya puushisande 2; naapolisi ye li 1 445 oya yelwaayelwa okuza ponkatu yuushisande 2 okuya puushisande 1; natango ye li 600 oya yelwaayelwa okuza puushisande 1 okuya puuwarrant 2; omanga ye li 707 oya pewa onkatu yuuwarrant 1 okuza puuwarrant 2.
Aapolisi esiku ndyoka oya holola enyanyu nolupandu sho ya pewa oonkatu oompe nokwi indile aaniilonga pamwe mboka inaaya yelwaayelwa ya kale ya ngungumana nokutsikila taya longo neitulemo.
Omupolisi gulwe, Thomas Shivute, ngoka a yelwaayelwa nokupewa onkatu yuushisande 1 okwa pandula sho a pewa onkatu ya landula ko.
“Shika otashi pendje omukumo ndi tsikile okulonga nuudhiginini oshowo okugamena noku kalekapo oompango adhihe,” ta pandula ngaaka. vkaapanda@nepc.com.na